Elimizdiń batysyndaǵy áskerı qyzmetkerler daýys berýdi aıaqtady

AQTAÝ. QazAqparat - «Batys» óńirlik qolbasshylyǵynyń jeke quramy jáne olardyń otbasy músheleri saılaýǵa belsene aralasýda. Onyń ishinde 1500-nan astam sarbaz saılaýǵa alǵash ret qatysyp otyr, dep habarlaıdy QazAqparat tilshisi.

Áskerı qyzmetshiler atalmysh is-sharanyń mańyzdylyǵy men jaýapkershiligin uǵyna otyra, kezekten tys saılaýdy tarıhı oqıǵa dep baǵalap otyr.

Aqtaý qalasynda áskerı qyzmetshiler úshin 25744 áskerı bóliminde jeke saılaý ýchaskesi qurylsa, Atyraý jáne Aqtóbe garnızonynyń áskerı qyzmetshileri ózderi tirkelgen oryndarda daýys berdi. Áskerı qyzmetshilerdiń basym bóligi Prezıdent saılaýyna alǵash ret qatysyp otyr.

Olardyń biri, kóktemgi shaqyrylymda Almatydan kelgen qatardaǵy jaýynger Sanjar Ádilbaev.

«Osy saılaýda, bizder tek qana elimizdiń Prezıdentin emes, Qarýly Kúshterdiń Joǵary qolbasshysyn da saılaýdamyz. Sondyqtan men, elimizdiń bolashaǵy úshin durys sheshim qabyldadym dep sanaımyn», - dep atap ótti ol.

Keıbir áskerı qyzmetshiler, tań atysymen saılaý ýchaskesine otbasymen birge kelip jetti. Olardyń biri 41433 áskerı bóliminiń serjanty 2 synypty serjant Baǵdat Baıserikov.

Sondaı-aq, «Batys» óńirlik qolbasshylyǵynyń áskerleri qolbasshysy polkovnık Nurlan Aldııarov, áskerı bólim komandırleri men basqa da ofıtserleri óz tańdaýlaryn jasady.