Elimizdiń batysynda «Bekire» balyq qorǵaý aktsııasy bastaldy
Balyq sharýashylyǵy komıteti tóraǵasynyń orynbasary Aıan Bahııanovtyń aıtýynsha, Atyraý, Mańǵystaý jáne Batys Qazaqstan oblystarynda «Bekire-2023» keń aýqymdy balyq qorǵaý aktsııasy 1 sáýirden 31 mamyrǵa deıin jalǵasady.
«Tabıǵat jáne quqyq qorǵaý organdarynyń qyzmetkerleri balyqtardyń, onyń ishinde bekire tuqymdas balyqtardyń ýyldyryq shashatyn jerlerge qonys aýdarýyn qamtamasyz etý úshin zańsyz aýlaý men aınalymyna qarsy is-qımyl boıynsha kúsh biriktiredi.
Balyq qorǵaý is-sharalarynyń tıimdiligin arttyrý úshin ekologııa jáne tabıǵı resýrstar, ishki ister mınıstrleri men ulttyq qaýipsizdik komıtetiniń tóraǵasy «Bekire-2023» balyq qorǵaý aktsııasyn ótkizý týraly birlesken buıryqqa qol qoıdy.
Osy buıryqpen balyq qorǵaý aktsııasyn ótkizý kezinde quqyq jáne tabıǵat qorǵaý organdarynyń ózara is-qımyly jónindegi úılestirý shtabynyń quramy, sondaı-aq aktsııa kezinde birlesken is-qımyl jospary bekitildi. Úılestirý shtabyna basshylyq jasaý Balyq sharýashylyǵy komıtetine júktelip otyr», - dep habarlady Aıan Bahııanov.
Onyń aıtýyna qaraǵanda, aktsııa aıasynda brakonerlik faktileri jıi baıqalýy yqtımal aýmaqtarda jyljymaly beketter men mobıldi reıdtik toptar uıymdastyrylǵan. Osy oraıda, negizgi kúshter men quraldar Kaspıı teńiziniń jaǵalaýy men akvatorııasynda, Jaıyq pen Qıǵash ózenderiniń saǵalyq keńistiginde shoǵyrlanǵan. Aktsııa kezinde áýejaılarda, vokzaldarda men avtotrassalarda balyq ónimderin áketýge baqylaý kúsheıtilgen.
«Memleket basshysynyń Kaspıı teńizindegi brakonerlikke qarsy kúresti kúsheıtý jónindegi tapsyrmasy bar. Osy taprsyrmany oryndaý maqsatynda Ekologııa jáne tabıǵı resýrstar mınıstrligi men Іshki ister mınıstrligi 2023 jylǵy 1 naýryzda Jaıyq-Kaspıı basseıni akvatorııasynda brakonerlikke qarsy kúres jónindegi 2023-2024 jyldarǵa arnalǵan birlesken is-sharalar josparyn bekitti. Búginge deıin bul jospar sheńberinde Jaıyq-Kaspıı basseıniniń sý aıdyndarynda tabıǵat qorǵaý zańnamasyn buzýdyń 129 deregi anyqtaldy. Zań buzýshylarǵa qarsy 2 qylmystyq is qozǵalyp, 2 mln teńgeden astam somaǵa aıyppul salyndy. Zańsyz aınalymnan 500 keliden astam balyq, onyń ishinde 184 keli bekire, balyq aýlaýǵa tyıym salynǵan 186 qural alyndy», - dep málim etti Aıan Bahııanov.
Eske sala ketelik, budan burynAtyraý oblysynda GAZel júrgizýshisi 400 keliden astam bekiremen ustalǵan bolatyn.