Elimizdiń batysynda áskerı qyzmetshilerdiń daıyndyǵy tekserilýde
Tekseristiń negizgi maqsaty jeke quramnyń mashyqtyǵynyn, vzvodtardyń, rotalardyń, quramalar men bólimder batalondary basqarmalarynyń shynaıy deńgeıin, bólimshelerdiń qysqa merzimde qoıylǵan jaýyngerlik tapsyrmalardy oryndaýǵa ázirlikterin tekserý, sondaı-aq oqý-jaýyngerlik tapsyrmalardy pysyqtaý, jaýyngerlik daıarlyq josparlary men baǵdarlamalaryn oryndaý barysynda bólimsheler men olardyń basqarý organdarynyń jaýyngerlik daıarlyǵy men úılesimdiliginiń deńgeıin baǵalaý bolyp tabylady.
«Osyǵan oraı, óńirlik qolbasshylyqtyń Basqaramasy oftserleri quramynan keshendi komıssııa quryldy. Olar barlyq áskerı bólimderge jiberildi. Qorytyndy tekseris birneshe kezeńmen ótkiziledi dep josparlanǵan. Tekseriske shtattyq jaýyngerlik tehnıkamen jaýyngerlik oq atýlar men taktıkalyq oqý-jattyǵýlardy ótkize otyryp, túrler, ásker tekteri men óńirlik qolbasshylyqtardyń, batalondardyń (dıvızıondardyń) barlyq basqarmalary, vzvodtar, rotalar (batareıalar) men olarǵa teńestirilgender tartyldy.
Oqytý pánderi boıynsha sabaqtar bólimderdiń udaıy ornalasý pýnktterinde jáne oqý-jattyǵý ortalyqtary men polıgondarda ótýde», - dedi «Batys» óńirlik qolbasshylyǵy áskerleriniń qolbasshysy polkovnık Nurlan Aldııarov.
Tekseriletin pánderdiń qatarynda atys, taktıkalyq, arnaıy daıyndyq, jaýyngerlik mashınalardy júrgizý, áskerı topografııa, ınjenerlik, dene jáne saptyq daıarlyq. Komıssııa sondaı-aq, qarý-jaraq pen áskerı tehnıkanyń jaı-kúıin, baǵynysty quramalarda jaýyngerlik daıarlyqty basshylyqqa alý boıynsha laýazymdy adamdardyń jumysynyń uıymadastyrylý júıesin, jaýyngerlik jáne jumyldyrý ázirligin tekseredi.
Ár áskerı qyzmetshige jeke tártipte jáne bólimsheler quramynda teorııa júzinde ǵana emes, sonymen birge praktıka júzinde emtıhandar tapsyrýǵa týra keledi.