Elimizdiń bas kólik saqshysy Máskeýde ótken alǵashqy Jeńis sherýine qatysqan UOS ardageri I. Karavaevty quttyqtady
Elimizdiń bas kólik saqshysy Ivan Dmıtrıevıchti óziniń jáne jeke quram atynan 9 mamyr - Uly Jeńis kúni merekesimen quttyqtap, oǵan aqshalaı syıaqy men azyq-túlik sebetin tabys etti, dep habarlaıdy Kóliktegi ІІD baspasóz qyzmeti.
Ardagerdiń úıindegi kezdesý jyly ári kóterińki kóńil-kúıde ótti. Ivan Dmıtrıevıch qonaqtardy keýdesine medaldar men ordender taǵylǵan saltanatty úlgidegi kıimimen qarsy aldy.
«Biz Uly Otan soǵysy ardagerleriniń aldynda, árdaıym, basymyzdy ıemiz. Olardyń qaısarlyǵy men otansúıgishtigi, surapyl soǵysta kórsetken jankeshti erlikteri búgingi jas býynǵa ónege», - dedi Berik Baıboluly. Sondaı-aq, ol ardagerdiń denine saýlyq, uzaq ǵumyr, otbasyna baq-bereke tiledi.
Ivan Karavaev 1925 jyly Aqmola oblysynda dúnıege kelgen. 1943 jyly Aqmola oblystyq áskerı kommısarıatymen Termez qalasyndaǵy artıllerııa ýchılışesiniń jedel kýrsyna jiberildi. Kýrsty támamdaǵan soń, ekinshi Ýkraına maıdanyna joldanady. Ol osy qurammen Dneprden Pragaǵa deıin, sondaı-aq Bolgarııa, Vengrııa, Avstrııa, Chehııa jáne Slavakııa elderin júrip ótken.
Budan soń, aǵa leıtenant Ivan Karavaev, fashısterdi jeńgen Keńes áskerindegi maıdandas joldastarymen birge Qıyr Shyǵysqa Manchjýrııany azat etýge úles qosty. Artynsha Germanııanyń Podstam qalasyna Keńes áskeri tobyna jiberilip, onda taǵy da jeti jyl qyzmet atqarady.
Ol Máskeý qalasynda ótken Uly Jeńis kúnine arnalǵan alǵashqy áskerı sherýge qatysqan.
1952 jyly týǵan jeri Qazaqstanǵa oralady. Soǵystan keıin kóp jyldar boıy Otanǵa qyzmet etken. Sonymen qatar, 20 jylǵa jýyq ýaqyt Kóliktegi ІІD-de abyroımen qyzmet atqardy.
Kezdesý barysynda, departament bastyǵy men ardeger surapyl soǵys týraly, búgingi beıbit ómir jaıynda áńgime órbitti.
Qazir Ivan Dmıtrıevıch 89 jasta. Otstavkadaǵy polıtsııa polkovnıgi seksenniń seńgirine shyqsa da ózin tyń ári sergek sezinedi. Onyń boıyndaǵy tabandylyq pen tózimdilik qasıetteri jastarǵa úlgi bolarlyqtaı-aq.