Elimizdiń barlyq óńirinde ekonomıkanyń oń ósimi baıqaldy - UEM

ASTANA. QazAqparat - Elimizdiń barlyq óńirinde ekonomıka salalarynda oń ósý qarqyny baıqaldy. Bul týraly Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Negizgi kapıtalǵa salynatyn ınvestıtsııalardyń ósý qarqyny jalǵasýda. Olar 23,7 paıyzǵa artty. Investıtsııalardyń eń úlken ósimi - 32,7 paıyzy ónerkásipte tirkelgen. Bul Shymkent munaı óńdeý zaýytyn jańǵyrtýǵa jáne Teńiz ken ornynda bolashaq keńeıtý jobasyn iske asyrýǵa baılanysty. Bul rette Shymkent munaı óńdeý zaýytyn jańǵyrtý sheteldik tikeleı ınvestıtsııalardyń aıtarlyqtaı aǵyny esebinen júzege asyrylýda. Bul aǵymdaǵy jyldyń birinshi toqsanynda munaı óńdeýge tikeleı sheteldik ınvestıtsııalar kóleminiń 5,4 esege ósýimen rastalady», - dedi T. Súleımenov.

Jalpy tikeleı sheteldik ınvestıtsııa boıynsha 6,7 mlrd AQSh dollary tartyldy. Bul 2017 jyldyń sáıkes kezeńimen salystyrǵanda 24,4 paıyzǵa joǵary.

Mınıstrdiń sózine qaraǵanda, óńirlik bóliniste barlyq jerlerde ekonomıka salalarynda oń ósý qarqyny baıqalady. Budan bólek, aýyl sharýashylyǵy boıynsha barlyq óńirlerde oń úrdis saqtalýda. Alaıda 6 óńir respýblıkalyq deńgeıden (3,5%) tómen qarqyn kórsetti.

Qurylys boıynsha artta qalǵan óńirler sany 2-den 4-ge deıin ósti. Bul turǵyda Atyraý oblysyndaǵy ahýal ótken aımen salystyrǵanda jaqsardy.

Investıtsııalar boıynsha Pavlodar (1,5 paıyzǵa tómendeý) oblysynan basqa barlyq óńirlerde ınvestıtsııalyq aǵyndardyń ósýi anyqtaldy.