Elimizdiń barlyq kólik ınfraqurylymy shtattyq rejımde jumys istep tur

ASTANA. QazAqparat - Qazirgi tańda elimizdiń barlyq kólik ınfraqurylymy shtattyq rejımde jumys isteýde. Bul týraly Indýstrııa jáne ınfraqurylymdyq damý mınıstrliginiń baspasóz hatshysy Janjigit Omarhan málimdedi, dep habarlaıdy QazAqparat

«Poıyzdar men ushaqtar jáne avtobýstar kúndegideı jolaýshylar tasymalyn uıymdastyrýda. Respýblıkalyq mańyzy bar kólik joldaryndaǵy qazirgi jaǵdaı men ondaǵy qozǵalys qarqyndylyǵy da aldyńǵy aptalardaǵydaı qalypty deńgeıde», - dep jazdy vedomstvo ókili áleýmettik jelidegi paraqshasynda.

Onyń aıtýynsha, tasymaldaý syıymdylyǵyn arttyrý jáne reısterdiń keshigý sanyn azaıtý maqsatyndaǵy tapsyrmany oryndaý úshin otandyq áýe parki taǵy bir «Boeing-737» ushaǵymen tolyqqan. Bul - SCAT avıakompanııasynyń sońǵy bir jarym aıda alǵan tórtinshi áýe kemesi. Syıymdylyǵy 189 oryndyqty quraıtyn ushaq avıakompanııa parkindegi 30-shy ushaq.

«Jyl sońyna deıin Qazaqstannyń azamattyq avıatsııa floty taǵy 10 áýe bortymen tolyǵady dep josparlanyp otyr», - delingen baspasóz hatshysynyń jazbasynda.

Aıta keteıik, tańerteń Ulttyq qaýipsizdik komıteti Reseımen shekaradaǵy ahýal baqylaýda ekenin málimdegen bolatyn.

Іshki ister mınıstrliginiń Kóshi-qon qyzmeti sheteldikterdiń Qazaqstanda bolý tártibi zańmen retteletinin habarlady.

Foto: facebook.com/zhanzhigit.omarkhan