Elimizdiń barlyq eldi mekeninde taza sý qoljetimdi bolýǵa tıis – Memleket basshysy

PAVLODAR. QazAqparat - Bıyl Pavlodar oblysynda taza sýmen qamtýǵa qatysty 19 joba júzege asyrylyp jatyr. Bul týraly Memleket basshysy Qasym-Jomart Toqaev aımaq jurtshylyǵymen kezdesýinde málim etti, dep habarlaıdy QazAqparat BORT 1 telegram kanalyna siltememen.

«Úsh jylda aýyldaǵy aǵaıyndy taza sýmen qamtý kórsetkishi 55-ten 94 paıyzǵa deıin ósti. Bıyl aımaqta osyndaı 19 joba júzege asyrylyp jatyr. Ákimdik kelesi jyly quny 14 mıllıard teńge bolatyn taǵy 39 jobany qolǵa alýdy usynyp otyr. Osyǵan oraı, Úkimetke qarjy bólýdi tapsyramyn. Jalpy, elimizdiń barlyq eldi mekeninde taza sý qoljetimdi bolýǵa tıis. Men byltyrǵy Joldaýymda 5 jyldyń ishinde qalalar men aýyldardy 100 paıyz sýmen qamtamasyz etýdi tapsyrdym. Úkimet osy mindettiń oryndalýyn erekshe baqylaýǵa alýy kerek», - dedi Prezıdent.