Elimizdiń Áskerı-áýe kúshteri AQSh-tyń «Hıýı» tikushaǵyna ıe boldy (FOTO)

ASTANA. QazAqparat - QR QK ÁQK Áskerı-áýe kúshteriniń avıaparki Qazaqstan men AQSh arasyndaǵy áskerı-tehnıkalyq yntymaqtastyq josparyna sáıkes UH-1H-II «Hıýı» tikushaǵymen tolyqty. Bul aqysyz negizdegi áskerı-tehnıkalyq yntymaqtastyq sheńberinde jetkiziletin úshinshi tikushaq, dep habarlaıdy Qorǵanys mınıstrliginiń baspasóz qyzmeti.

Tikushaqtan basqa, sondaı-aq qosalqy bólshekter, agregattar, jınaqtaýshy jáne shyǵys materıaldary jetkizildi. «Hıýı» tikushaqtary ártúrli oqý-jattyǵýlarda, onyń ishinde qazaqstandyq «Qazbat» bitimgershilik batalony men QR QK Aeroutqyr áskerleri «Qazbrıg» bitimgershilik brıgadasynyń is-qımyldary pysyqtalatyn «Dala qyrany» taktıkalyq-arnaıy bitimgershilik oqý-jattyǵýlarda keńinen qoldanylady. 

Budan buryn 2006-2007 jyldary qazaqstandyq ushý jáne ınjenerlik-tehnıkalyq quramy atalmysh tikushaqta teorııalyq jáne praktıkalyq qaıta jattaýdyń tolyq kýrsynan ótti.  «Bul tikushaqtar qarapaıym jáne kúrdeli meteojaǵdaılarda, kúndiz-túni, jyl boıy paıdalanylady. Paıdalaný kezeńinde qandaı da bir isten shyǵý bolǵan emes, tehnıka senimdi», - dep ÁÁK qolbasshysynyń orynbasary polkovnık Erkin Jumaǵalıev atap ótti.

UH-1H-II tikushaǵy - bul desantty (12 adamǵa deıin) jáne ártúrli júkterdi tasymaldaý, izdestirý-qutqarý jumystaryn (onyń ishinde júkshyǵyrmen) oryndaý, áýeden barlaý, jaralylardy kóshirý úshin arnalǵan Bell kompanııasynyń jeńil kóp nysanaly áskerı-kóliktik tikushaǵy. Onyń 1 800 attyń kúshindeı qýatty bar.  T-53-L-703 bir qozǵaltqyshpen jabdyqtalǵan, sondaı-aq navıgatsııalyq jáne radıoelektrondyq qondyrǵynyń keshenimen jabdyqtalǵan.  Barynsha salmaǵy - 4 762 keli, joǵary jyldamdyǵy - 240 km/s.