Elimizdiń ár óńirinde jastar úıin salý máselesi qaralyp jatyr - mınıstrlik

ASTANA. QazAqparat - Elimizdiń ár óńirinde jastar úıin salý máselesi qarastyrylyp jatyr. Bul týraly Astana ótip jatqan jastar forýmy barysynda QR Qoǵamdyq damý mınıstrligi Jastar jáne otbasy komıteti tóraǵasynyń mindetin atqarýshy Ashat Oralov málim etti, dep habarlaıdy QazAqparat tilshisi. 

«Búgingi sharanyń maqsaty Elbasy Joldaýyn jastarǵa túsindirý. Kelesi jyl - «Jastar jyly». Sonyń aıasynda elimizde júıeli jumystar atqarylǵaly tur. Sondyqtan da jastardyń Joldaý men odan týyndaıtyn máselelerge, Jastar jylyna qatysty oı-pikirlerin bilý maqsatynda osyndaı jıyn uıymdastyryp otyrmyz», -dedi Ashat Oralov.

Onyń sózinshe, elimizdegi ár óńirdiń ózindik erekshelikteri men qajettilikteri negizinde arnaıy jastarǵa arnalǵan baǵdarlama ázirlenedi.

«2015 jyl elimizde Qazaqstan halqy Assambleıasy jyly dep jarııalanyp, sonyń negizinde óńirlerde dostyq úıleri salynyp, osy baǵyttaǵy
jalpy jumystardyń jandana túskeni esimizde. Sol sııaqty 2019 jyly Jastar jylyna oraı elimizdiń ár óńirinde jastar úıin, jastar saraıyn salý jaıyn oılastyrmaqpyz», -dedi A.Oralov.

Onyń aıtýynsha, jastar úıi barlyq áleýmettik deńgeıdegi jastar basyn qosatyn ortalyq bolady. Onda tek qana is-sharalar ótip qana qoımaı, jastardyń óz ıdeıalaryn júzege asyratyn kreatıv ortalyǵyna aınalýy tıis.

 

Foto: www.facebook.com - Ashat Oralov