Elimizdiń 16 óńirinde óńdeý ónerkásibi ósti – mınıstr

ASTANA. QazAqparat – Osy jyldyń 4 aıynda elimizdiń 16 óńirinde óńdeý ónerkásibi ósti. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Óńdeý ónerkásibinde oń ósim saqtalyp otyr. Óndiris kólemi 5,1 paıyzǵa ósti. Kórsetkish ósimi 16 óńirde tirkeldi. Sonyń ishinde eń joǵarǵy ósimdi Qostanaı, Soltústik Qazaqstan, Abaı oblystary jáne Almaty qalasy kórsetti. Óńdeý ónerkásibi salalary boıynsha mashına jasaý óndirisiniń - 35,9, onyń ishinde avtomobıl jasaýdyń – 41,2, elektr jabdyqtaryn jasaýdyń 45,6 paıyzǵa ósýi qamtamasyz etildi. Sondaı-aq ósim kelesi salalarda baıqalyp otyr: azyq-túlik óndirisi – 7,7, munaı óńdeý ónimderi – 2,8, hımııa ónerkásibi – 0,5, sýsyndar óndirisi – 6,9, farmatsevtıka óndirisi – 3,6, jeńil ónerkásip – 34,9», - dedi Álibek Qýantyrov.

Onyń dereginshe, taý-ken ónerkásibindegi óndiris kólemi 2 paıyzǵa joǵarylady.

«Bul rette gaz óndirý – 4,4, munaı óndirý – 3,2, ózge de paıdaly qazbalardy óndirý 20,6 paıyzǵa ósti. Metall kenderin óndirý – 0,8, taý-ken ónerkásibinde qyzmet kórsetý – 1,9, kómir óndirý 9,9 paıyzǵa tómendedi», - dedi mınıstr.