Elimizdiń 13 óńiri ınvestıtsııa tartýda ósim kórsetti

NUR-SULTAN. QazAqparat - 2020 jyldyń 9 aıynda negizgi kapıtalǵa 8,3 trln teńge somasynda ınvestıtsııa tartyldy. Bul týraly Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Negizgi kapıtalǵa 8,3 trln teńge somasynda ınvestıtsııa tartyldy. 13 óńir ósim kórsetti. Onyń ishinde eń joǵary kórsetkishter - Túrkistan oblysynda jáne Shymkent qalasynda baıqalyp otyr. 4 óńirde tómendeý tirkeldi. Olar - Qyzylorda, Atyraý, Batys Qazaqstan jáne Qaraǵandy oblystary», - dedi mınıstr.

Onyń dereginshe, qurylys sektory turaqty qarqynmen damyp keledi. Oryndalǵan jumystardyń kólemi 10,5 paıyzǵa ósti. Joǵary ósý Túrkistan oblysynda jáne Shymkent qalasynda baıqalady. 9,6 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 9 paıyza kóp.

«Óńirlerde 7 ekonomıkalyq kórsetkish boıynsha jalpy jaǵdaı mynadaı. 5 kórsetkish boıynsha 7 óńirde ósim baıqalady. Olar - Aqmola, Almaty, Jambyl, Qostanaı, Pavlodar, Soltústik Qazaqstan oblystary jáne Shymkent qalasy. Sondaı-aq 7 óńirde 4 kórsetkish boıynsha ósim tirkeldi. Bul ortasha deńgeı. 3 óńirde 3 kórsetkish boıynsha ǵana ósý baıqalady. Olar - Atyraý, Batys Qazaqstan jáne Qyzylorda oblystary»,- dedi Rýslan Dálenov.