Elimizden keıbir aǵash materıaldaryn syrtqa asyrýǵa tyıym salyndy

NUR-SULTAN. QazAqparat - 8 maýsymnan bastap elimizden aǵash materıaldarynyń jekelegen túrlerin shyǵarýǵa tyıym salyndy. Bul týraly QR QM Memlekettik kirister komıteti habarlady.

Atalǵan tyıym otandyq aǵash óńdeý ónerkásibin damytý jáne aǵash ónimderin zańsyz áketýge jol bermeý maqsatynda engizilgen.

«Shekteý 2022 jylǵy 8 maýsymda kúshine engen «Aǵash materıaldarynyń jekelegen túrlerin áketýdi retteýdiń keıbir máseleleri týraly» Qazaqstan Respýblıkasy Indýstrııa jáne ınfraqurylymdyq damý mınıstriniń 2022 jylǵy 7 maýsymdaǵy № 322 buıryǵymen engizilgen.

Atalǵan buıryq alty aı qoldanysta bolady jáne EAEO SEQ TN 4406910000 «Sińirilgen temirjol nemese tramvaı joldaryna arnalǵan qylqan japyraqty tuqymdardan jasalǵan aǵash shpaldar» kodyn qospaǵanda, Qazaqstan Respýblıkasynyń aýmaǵynan aǵash materıaldarynyń jekelegen túrlerin (EAEO SEQ TN kody 4401, 4403, 4404, 4406 jáne 4407) áketýge tyıym salady» delingen vedomtsvo taratqan habarlamada.

Osyǵan deıin qoldanysta bolǵan «Aǵash materıaldarynyń jekelegen túrlerin áketýdi retteýdiń keıbir máseleleri týraly» Qazaqstan Respýblıkasy Indýstrııa jáne ınfraqurylymdyq damý mınıstriniń 2021 jylǵy 23 qarashadaǵy № 611 buıryǵymen el aýmaǵynan aǵash materıaldarynyń jekelegen túrlerin áketýge tyıym salý 2021 jylǵy 7 jeltoqsannan bastap 2022 jylǵy 7 maýsymdy qosa alǵanda qoldanylǵan bolatyn.