Elimizdegi «Jasyl ekonomıkaǵa» betburysty sheteldik sarapshylar erekshe atady

ASTANA. QazAqparat - Elordada halyqaralyq X Astana ekonomıkalyq forýmy ótip jatyr. Táýelsizdik saraıynda jer jahannyń ár qıyrynan kelgen mamandar, sarapshylar, kásipkerler jáne Qazaqstan Úkimetiniń basshylary bas qosyp, pikir almasyp jatyr.

Astana ekonomıkalyq forýmy - jahandyq máselelerdi talqylaýǵa jáne sheshýge arnalǵan iskerlik alań. Óziniń aýqymy jaǵynan Eýrazııa keńistiginde teńdesi joq bul shara alǵash ret 2008 jyly uıymdastyrylǵan bolatyn. Ótken ýaqyt aralyǵynda forýmǵa 150 elden myńdaǵan delegat qatysyp, jalpy kólemi mıllıardtaǵan dollardy quraıtyn mańyzdy kelisimder jasasty.

Búkilálemdik banktiń «Qazaqstan: eldi júıeli dıag­nostıkalaý» atty sessııasynda sóz sóılegen Búkilálemdik banktiń Ortalyq Azııa boıynsha bas ekonomısi Hrıstos Kostopýlos eldi júıelik dıagnostıkalaýdyń tusaýkeser esebin jasady. Ol elimizdiń óz táýelsizdigine ıe bolǵannan bergi damý jaǵdaıyna táptishteı toqtalyp ótti. Onda ekonomıkanyń damýy alǵashqy daǵdarysty eńsergennen keıin 10 paıyzǵa deıin kóterilgeni, odan 6 paıyzǵa, bertin 1 paıyzǵa deıin túskendigi, sońǵy kezde qaıta kóterile bastaǵandyǵy, ekonomıka salasynda bolǵan qurylymdyq ózgerister, 2007 jyldan beri ekonomıkany nesıeleý kóleminiń azaıa bastaǵandyǵy, ekonomıkany basqarýda memlekettiń belsendi ról atqarǵany baıandaldy. Bas ekonomıst elde júrgizilip jatqan jekeshelendirý úderisine qoldaý bildirdi. Integratsııalaný úderisin kúsheıtý qajettigin aıtty. Sondaı-aq, qoǵamdaǵy oqshaýlanǵan top máselesin aıtty. Onyń qata­ryna úı sharýashylyǵymen shu­ǵyl­danýshylardy, jeke kásipkerlerdi qosýǵa bolady eken. Endigi kezekte Úkimet osy toppen jumys istep, olardyń uıymdasqan jumysyn jaqsartýy, qoǵamǵa qosar úlesin nyǵaıtýǵa qol jetkizýi qajet. Basqa da birqatar usynys kóldeneń tartyldy. 

Munan keıin Parlament Má­jilisiniń depýtaty, Astana qalasy kásipkerler assotsıatsııasynyń je­tekshisi Pavel Kazantsev, Qazaqstan salyq tóleýshiler qaýym­das­ty­ǵynyń basqarma tóraıymy Janat Ertilesova sóz alyp, óz oılaryn ortaǵa saldy. Basqosý sońy zaldan túsken suraqtarǵa jaýap berýge, ózara pikir almasýlarǵa ulasty.

Jekeshelendirý - damý draıveri Astana ekonomıkalyq forý­my­nyń aıasynda «Samuryq-Qazy­na» qoryn jekeshelendirý baǵdarlamasynyń órkendeýi jáne onyń el ekonomıkasyndaǵy róli» atty sessııa ótti. Ony «Samu­ryq-Qazyna» UÁQ» AQ basqarma­synyń tóraǵasy Ómirzaq Shókeev ashyp, quttyqtaý sóz sóıledi.

«Qa­zaqstanda kólemi boıynsha teńdesi joq jekeshelendirý baǵdarlamasy is júzine asyrylǵaly otyr. Onyń basty maqsaty - el ekonomıkasynda memlekettiń qatysý úlesin 15 paıyzǵa deıin tómendetý. Bul je­keshelendirý baǵdarlamasy bary­syndaǵy bizdiń basty maqsatymyz - ekonomıkaǵa barynsha mol ınvestıtsııa tartý. El ekonomıkasyn damytýdy jańa sapalyq deń­geıge kóterý», dedi ol sózinde.

Qazaqstanda bul jekeshelendirý tizimine 800-ge tarta kompanııa kirip otyr. Onyń ishinde negizgi 215 kompanııa «Samuryq-Qazyna» qorynyń aktıvteri bolyp tabylady.  Osy sessııaǵa qatysýshy otan­dyq jáne shet el ınvestıtsııalyq kompanııalary ókilderiniń aldyn­da «Samuryq-Qazyna» UÁQ» AQ aktıvi bolyp tabylatyn mem­lekettik kompanııalardy jeke­she­lendirýdiń aýqymy men tártibi týraly «Samuryq-Qazyna» UÁQ» AQ aktıvterin ońtaılandyrý bo­ıynsha basqarýshy dırektory Berik Bısenǵalıev baıandama jasady. Onyń aıtýynsha Qordyń jekeshelendirý nysandary As­tana men Almaty qalalarynda, Qazaqstannyń 14 óńirinde jáne 19 shet memlekette ornalasqan. Qor eli­mizdiń eń iri 6 ulttyq kompanııasynyń aktsııalaryn jarııaly túrde satylymǵa shyǵarady. Atap aıtqanda, «QazMunaıGaz» UK», «Qa­zaqstan temir joly» UK», «Eır As­tana», «Qazaqtelekom», «Qaz­atom­ónerkásip» UAK», «Qazposh­ta» aktsıonerlik qoǵamy kiredi.

Sessııa otyrystarynda jasyl qarjyny engizýdiń álemdik tájirıbeleri talqylanyp, Parıj kelisimin iske asyrýdy qoldaý úshin Qazaqstannyń qarjy sektorynyń áleýetine sholý jasaldy.  Sarapshylardyń pikirinshe, jahandy jappaı jasyl ekonomıkaǵa kóshirý ońaı sharýa emes. Oǵan qajet qarjynyń da kólemi az emes eken. Mysaly, 2030 jylǵa deıin bul baǵyttaǵy jumystardy júzege asyrý úshin 19 trln dollar qar­jy kerek. Bul anyqtalǵan naqty 103 baǵyt boıynsha jumystardy júzege asyrýǵa jumsalmaq. Al Qazaq­standa qazirgi kúni jasyl ekono­mıkaǵa aıryqsha betburys baı­qalady. Muny pikirsaıysqa qatysqan sheteldik qonaqtar da aı­ryqsha atap ótti. Onyń bir sarasy álem kóz tikken EKSPO-2017 halyqaralyq mamandandyrylǵan kórmesiniń aıasynda júrgizilip jatqan jumystar der edik. Investıtsııaǵa ıkemdi el Astana ekonomıkalyq forýmy aıasynda Qazaqstannyń ın­ves­tıtsııalyq saıasaty egjeı-tegjeıli ortaǵa salynyp, «ınves­tı­tsııalyq saıasatqa ekinshi sholý» baǵ­darlamasy tanystyryldy.