Elimizdegi túrli ult aqyndarynyń óleńderi jınaqtalǵan antologııa jaryqqa shyqty

ASTANA. QazAqparat - Búgin QR Ulttyq akademııalyq kitaphanasynda QR Táýelsizdiginiń 25 jyldyǵyna arnalǵan «Máńgilik elim meniń» poezııasy antologııasynyń tanystyrylymy ótti, dep habarlaıdy Qazaqstan halqy Assambleıasynyń saıty.

Іs-sharaǵa Májilis depýtattary, Qazaqstan halqy Assambleıasy ǵylymı-saraptamalyq tobynyń músheleri, qoǵam qaıratkerleri, ǵylymı men shyǵarmashylyq zııalylary, shyǵarmalardyń avtorlary, Qazaqstannyń tanymal jazýshylary men aqyndary, BAQ ókilderi qatysty. 

«Máńgilik elim meniń» antologııasy Qazaqstan jazýshylar odaǵy, Qazaqstan halqy Assambleıasy, «Altyn Kyran» halyqaralyq qaıyrymdylyq qorynyń qoldaýymen jaryqqa shyqty.
«Bul kitaptyń basqa kitaptardan jóni de, joly da bólek. Sebebi, munda Qazaqstandaǵy túrli ult ókilderiniń eń úzdik shyǵarmalary toptastyrylǵan. Qaı oqyrmanǵa da oqýǵa yńǵaıly antologııa eki tilde qatar berilgenimen de qundy dep esepteımin. Osy jobany júzege asyrǵany úshin Qazaqstan Jazýshylar odaǵyna, úlken qoldaý kórsetken Qazaqstan halqy Assambleıasyna óz rızashylyǵymdy bildiremin», - dedi «Altyn Kyran» halyqaralyq qaıyrymdylyq qorynyń prezıdenti Islambek Saljanov. 

Antologııada Qazaqstandaǵy túrli ult aqyndarynyń (qazaq, orys, uıǵyr, kúrd, tatar, ýkraın, belorýs, nemis, káris, armıan, sheshen, ıngýsh, túrik, osetın, dúngen jáne t.b.) óleńderi jınaqtalǵan.

50 avtordyń óleńderi memlekettik tilde jaryq kórip, orys tiline aýdaryldy.