Elimizdegi saıası bıliktiń birizdilikpen jalǵasýynyń kýási bolyp otyrmyz – sarapshy

NUR-SULTAN. QazAqparat – Búgin «Nur Otan» partııasy saıası keńesiniń keńeıtilgen otyrysy ótti. Aýqymdy sharaǵa ishki saıasat pen bılikke qatysty birqatar mańyzdy dúnıeler qozǵalyp, sheshimder qabyldandy. Osy oraıda aıtýly saıası oqıǵaǵa qatysty QR Prezıdenti janyndaǵy Qazaqstan strategııalyq zertteýler ınstıtýtynyń Áleýmettik-saıası zertteýler bóliminiń basshysy Indıra Rystına óz pikirin bildirdi, dep habarlaıdy QazAqparat tilshisi.

«Nur Otan» partııasynyń saıası keńesiniń otyrysynda Elbasy biraz máseleni qozǵady. Sol máselelerdiń basty túıini retinde memlekette birizdilik saıasatynyń saqtalýy jáne beıbit ómir súrý kerektigi aıtyldy. Sondaı-aq, Elbasy pandemııa kezindegi qıynshylyqty halyqtyń bılikpen birge eńserip kele jatqandyǵyna erekshe toqtalyp ótti. Jáne de halyqaralyq arenadaǵy saıası kúshterdiń transformatsııasyna baılanysty Qazaqstannyń kópvektorly saıasat ustaný kerektigin alǵa tartty», - dedi Indıra Rystına.

Sarapshynyń aıtýynsha, elimiz óziniń syrtqy saıasatqa qatysty ustanymyn ózgertpeýi tıis.

«Odan bólek, Nursultan Nazarbaev 40-50 jyldyń ishinde kóptegen jetistikterge qol jetkize alatyndyǵymyzǵa senim bildirdi. Sol jetistiktermen qatar eldegi beıbitshilik pen turaqtylyq ta qatar damýy tıis. Elbasy atap ótken basty tezısterdi júzege asyrýdyń qadamy retinde, saıası bılik tranzıtiniń beıbit túrde ótýine kýá bolyp otyrmyz. Onyń dáleli Elbasy «Nur Otan» partııasynyń tóraǵalyǵyn Prezıdentke berip otyr. Partııa tizginin Prezıdenttiń alýy el bıleý saıasatynyń birizdilikpen jalǵasýynyń belgisi», - deıdi ol.

Aıta keteıik, búgin elordada «Nur Otan» partııasy saıası keńesiniń keńeıtilgen otyrysy ótti.

Atalǵan jıynda Elbasy Nursultan Nazarbaev «Nur Otan» partııasynyń Tóraǵasy ókilettigin Prezıdentke tapsyratyndyǵyn jetkizdi.