Elimizdegi pedagogtardyń 90 paıyzy vaktsına aldy

NUR-SULTAN. QazAqparat – Qazaqstanda pedagogtardyń 90 %-y koronavırýsqa qarsy vaktsına aldy. Bul týraly QR Bilim jáne ǵylym mınıstriniń shtattan tys keńesshisi, Narhoz ýnıversıtetiniń prezıdenti Mıras Dáýlenov málim etti, dep habarlaıdy QazAqparat tilshisi.

«Joǵary oqý orny qyzmetkerleri men stýdentterdiń vaktsına alý sharty bar. Vaktsına alǵan pedagogtardyń kórsetkishin 10 paıyzǵa jetkizý mindeti tur. Árıne bul kórsetkishke medıtsınalyq turǵydan vaktsına alýǵa bolmaıtyn pedagogtar kirmeıdi. Qazirgi vaktsına alý úrdisi jaqsy júrip jatyr. Barlyq óńirdi qosa alǵanda pedagogtardyń 90 paıyzy vaktsına aldy. Stýdentter men oqytýshylardyń jáne oqýshylar men muǵalimderdiń densaýlyǵyn qorǵaý maqsatynda vaktsına alý mańyzdy», - dedi Mıras Dáýlenov.

Odan bólek, dáris kezinde stýdentter men oqytýshylar maska taǵý rejimin saqtaýy tıis.

«Biz dástúrli oqý formatyna kóshe otyryp, epıdahýaldy 2020 jylǵy 16 naýryzdaǵy jaǵdaıǵa jetkizbeýimiz kerek. Pandemııa kezinde biraz qyzmet tsıfrlandyryldy. Atap aıtsaq, jataqhanaǵa turýǵa ótinish berý, túrli anyqtamalar jáne sol sııaqty sharýalardy onlaın iske asyrýǵa bolady. JOO-y pandemııa kezindegi tájirıbelerin tıimdi qoldanýy tıis. Stýdentterdi dástúrli oqý formatyna kóshirýde Úkimet mańyzdy shara qabyldady dep oılaımyn. Degenmen bul qashyqtan oqý formaty qysqarady degen sóz emes, kerisinshe qashyqtan oqý sapaly bilimge qoljetimdilikti arttyrady», - deıdi ol.