Elimizdegi ózgeristerdiń mán-mańyzyn máslıhat depýtattary ár qazaqstandyqqa jetkizedi - Senat

NUR-SULTAN. QazAqparat - QR Parlamenti Senaty tóraǵasynyń orynbasary Asqar Shákirovtiń tóraǵalyq etýimen joǵary palatada Senat janyndaǵy jergilikti ókildi organdarmen (máslıhattarmen) ózara is-qımyl jónindegi keńestiń kezekti otyrysy boldy, dep habarlaıdy QazAqparat Senattyń baspasóz qyzmetine silteme jasap.

Sharaǵa Keńes múshelerinen basqa beınekonferentsııa baılanysy arqyly elimizdiń 17 óńiri máslıhattarynyń depýtattary qatysty.

Otyrys barysynda kún tártibindegi negizgi másele – Prezıdent Qasym-Jomart Toqaevtyń Qazaqstan halqyna Joldaýyn iske asyrýǵa máslıhattar depýtattarynyń qatysýy týraly jan-jaqty pikir almasyldy.

«Bul qujatta qazirgi zamandaǵy buryn-sońdy bolmaǵan syn-qaterler jaǵdaıynda elimizdiń tynys-tirshiligin qamtamasyz etýdiń jan-jaqty baǵdarlamasy qamtylǵan. Memleket basshysy óz Joldaýynda memlekettik basqarý júıesin jetildirý maqsatynda ózara baılanysty keshendi mindetter qoıǵan bolatyn. Jergilikti ózin-ózi basqarýdy damytý osy protsestiń mańyzdy baǵyttarynyń biri bolyp belgilendi, ol jergilikti ókildi organdardy nyǵaıtýdy kózdeıdi, olardyń qyzmeti halyq úshin barynsha ashyq bolýy tıis», - dedi Senat tóraǵasynyń orynbasary.

Osyǵan baılanysty óńirlerdi tıimdi damytýǵa járdemdesý Parlament joǵary palatasy qyzmetiniń mańyzdy baǵyttarynyń biri ekeni atap ótildi.

Jergilikti ókildi organdarmen ózara is-qımyl jónindegi keńes arqyly máslıhattarǵa olardyń zańnamalyq ókilettikteri aıasynda jan-jaqty kómek

kórsetilip keledi.

Otyrys barysynda elimizde júzege asyp jatqan saıası jáne ekonomıkalyq reformalardyń qozǵaýshy kúshteriniń biri bolýǵa arnalǵan «Rýhanı jańǵyrý» memlekettik baǵdarlamasyn ilgeriletý talqylaýdyń jeke taqyryby boldy.

«Qazaqstan máslıhattary depýtattarynyń birlestigi» RQB tóraǵasy Tóleýbek Muqashevtiń pikirinshe, «bul jumysta búgingi tańdaǵy eń ózekti

tásilder – eń aldymen jastar arasynda bilimqumarlyq pen bilimpazdyqty,

toleranttylyq pen kásibı sheberlikti dáripteý basym bolýy tıis».

Otyrysqa qatysýshylar saılaýshylarmen tyǵyz ári egjeı-tegjeıli jumys júrgizý qajettigi týraly ortaq pikirge toqtaldy. Batys Qazaqstan oblystyq máslıhatynyń hatshysy Málik Qulshar óz sózinde «máslıhat depýtattary Memleket basshysynyń Joldaýyn iske asyrýdyń joldary men mán-maǵynasyn árbir qazaqstandyqqa jetkizýi tıis» dep atap ótti.

Qazirgi kezde Senattyń úılestirýshi róli jaǵdaıynda bul jumysqa elimizde 20 myńǵa jýyq múshesi bar «Qazaqstan zańgerler odaǵy» RQB aıtarlyqtaı kómek kórsetedi. Onyń tóraǵasy Serik Aqylbaı «Qazaqstan

zańgerler odaǵy máslıhattar depýtattarynyń quqyqtyq saýattylyǵyn arttyrý maqsatynda Parlament qabyldap jatqan zańdar týraly birqatar

taqyryptyq dárister daıyndap, óńirlerge jiberildi. Bul jumys jalǵasatyn bolady» dep habardar etti.

Otyrys barysynda Aqparat jáne qoǵamdyq damý mınıstrligindegi «Rýhanı jańǵyrý» baǵdarlamasyn úılestirý departamenti, Memlekettik jergilikti basqarý ınstıtýty, sondaı-aq «Máslıhat jáne ákimdik-Maslıhat ı akımat» respýblıkalyq jýrnaly Keńes quramyna ujymdyq músheler retinde qabyldandy.

Otyrys qorytyndysy boıynsha qatysýshylar qaralǵan máselelerge sáıkes Keńes jumysynyń perspektıvalyq josparyn ázirledi.