Elimizdegi meshitter qazaqy stılde bolýy kerek - Bas múftı

NUR-SULTAN. QazAqparat - Elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasy janynan qurylǵan Qazaqy stıldegi meshit qurylysy boıynsha jumys tobynyń alǵashqy májilisi ótti, dep habarlaıdy QazAqparat muftyat.kz-ke silteme jasap.

«Meshit turǵyzýda ár halyq óziniń sáýlet óneri men dástúrin eskerip, ulttyq naqyshyn kórsetýge tyrysqan. Sondyqtan elimizdegi meshitterdiń de óziniń qazaqy stıli bolýy tıis. Sebebi bul meshitter ǵasyrlar boıy urpaqtan-urpaqqa amanat bolyp, halyq ıgiligine qyzmet etedi», - dedi Bas múftı Naýryzbaı qajy Taǵanuly.

Belgili sáýletshi, Memlekettik syılyqtyń ıegeri Saǵyndyq Janbolatov Dinı basqarmanyń qolǵa alyp otyrǵan jobasyn qoldaıtynyn aıta kelip, arnaıy jumys tobyn qurýdy usyndy. Jumys tobyna sáýletshiler Birlik Erejepov, Esimbet Qapabaev, Qanat Qurǵanovty, Esenǵalı Ahmetov jáne múftııat mamandaryn qosýdy usyndy.

Sondaı-aq jıyn barysynda qazaqy stıldegi meshit jobasy men maketin bekitý, meshit qurylysyna qatysty kemshilikterdi boldyrmaý úshin ınjenerlik jumystardy jetildirý, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» zańyna meshit qurylysy boıynsha bap nemese tarmaq engizý sekildi máseleler qaraldy.