Elimizdegi mektepterde balalardy tamaqpen qamtamasyz etý normatıvteri qaıta qaralady

ASTANA. QazAqparat – Mekteptegi psıhologııalyq qyzmetterdiń róli artady. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Balalardyń quqyqtaryn qorǵaý salasyna toqtalsaq, jetim balalardy qoldaý úshin otbasylyq qurylymnyń balamaly nysany – kásibı otbasy ınstıtýtyn engizemiz. Tıisti zańnamalyq ózgerister daıyn», - dedi A. Aımaǵambetov.

Sonymen qatar ol mekteptegi psıhologııalyq qyzmetterdiń róli artatynyn, pedagog-psıhologterdiń ádistemelik quraldarynyń biryńǵaı standarttary engiziletinin aıtty.

«Mektep pen ata-analardyń ózara qatynasy, qamqorshylyq keńesteriniń jumysy jańǵyrtylady. Budan bólek, balalardyń damýy úshin sapaly tamaqtaný erekshe mańyzǵa ıe. Bul rette balalardy tamaqpen qamtamasyz etý normatıvteri, as máziri qaıta qaralady. Bastaýysh synyptarynyń oqýshylaryna bir mezgil ystyq tamaq berý boıynsha jumys jalǵasady. Ashanalarda qolma-qol aqshasyz esep aırysý júıeleri, taǵamdardyń sapasyn baqylaý onlaın júıesi engiziledi, ashanalardyń materıaldyq tehnıkalyq bazasy jańartylady», - dedi mınıstr.

Budan buryn habarlanǵandaı, balabaqshalarda balalardy erte damytýdyń jańa modeli engizilip jatyr. Osy oraıda ondaǵy baǵdarlama da, oqytý ádisteri da túbegeıli ózgeredi.

Sonymen qatar, mektepterge arnalǵan jańa memlekettik standarttar men oqý baǵdarlamalary ázirlenip jatyr.

Búgin Úkimet otyrysynda bilim berýdi damytýdyń 2026 jylǵa deıingi tujyrymdamasynyń jobasy bekitildi.