Elimizdegi mektepterde 9 myńnan astam psıholog maman jumys isteıdi

ASTANA. QazAqparat - Elimizdegi 7,5 myńnan astam mektepte 9 myńnan astam psıholog maman jumys isteıdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken «Zorlyq-zombylyq pen qatal qarym-qatynastan qorǵaýda balalardyń quqyǵyn qamtamasyz etý» taqyrybyndaǵy baspasóz máslıhatynda QR Bilim jáne ǵylym mınıstrligi Balalar quqyǵyn qorǵaý komıtetiniń tóraıymy Zabıra Orazalıeva atty.

«Elimizdegi 7,5 myńnan astam mektepte 9084 psıholog maman jáne 4346 áleýmettik pedagog qyzmet istep jatyr. Sonymen qatar 2074 mektep oqýshylarymen jumys isteıtin polıtsııa ınspektory bar. Al 2377 mektepke beınebaqylaý kameralary ornatylǵan. Endi 2015-2016 oqý jylynyń sońyna deıin barlyq mektepter oqýshylarmen jumys isteıtin psıholog mamandarmen tolyqtaı qamtamasyz etiledi», - dep atap ótti ol.

Komıtet tóraıymynyń aıtýynsha, jyl basynan beri balalar quqyǵynyń buzylýyna baılanysty 4 myńǵa jýyq aryz-shaǵym kelip túsken. Onyń kóbisi ata- analar tarapynan kelgen shaǵymdar.

«Bular kóbine ata-analardyń ajyrasýy kezindegi balanyń qaı ata-anada qalýyna, balalardyń ózara kelispeýshilikterine baılanysty. Sonymen qatar, muǵalimderdiń is-qylyqtaryna baılanysty aryzdar kelip túsedi, degenmen olardyń jalpy sany kóp emes», - deıdi maman.

Aıta keteıik, búginde respýblıka boıynsha 5 mln-nan astam bala bar jáne olardyń árqaısysynyń óz densaýlyǵyn saqtaýǵa, qoǵamnyń jaǵymsyz áserlerinen qorǵalýǵa, rýhanı-adamgershilik turǵydan damýǵa quqyǵy bar. «Ózderińiz biletindeı, balalardy fızıkalyq-psıhıkalyq qysymnan, qatal kózqarastan jáne qorlaýdan qorǵaıtyn birqatar zańdar bar. Búgingi kúni mınıstrlik barlyq múddeli organdarmen, depýtattarmen birlesip balalar quqyqtary men múddelerin qorǵaý salasyndaǵy zańnamany jetildirýge bar kúshin salýda», - deıdi komıtet tóraıymy.