Elimizdegi etnıkaaralyq ahýaldy qazaqstandyqtardyń 94,9 paıyzy oń baǵalap otyr - QHA

ASTANA. QazAqparat - Etnıkaaralyq saladaǵy memlekettik saıasatty elimiz azamattarynyń 95,7 paıyzy qoldap otyr. Bul týraly búgin Astana qalasy Qazaqstan halqy Assambleıasynyń HІV sessııasynda Qazaqstan halqy Assambleıasy Tóraǵasynyń orynbasary - QHA hatshylyǵynyń meńgerýshisi Eraly Toǵjanov málim etti.

Cessııa «Qazaqstandyq otansúıgishtik konteksindegi Astana fenomeni: kópultty jáne kópkonfessııalyq qoǵamnyń tabysy» taqyrybynda ótip jatyr.

«Búginde elimizdegi etnıkaaralyq ahýaldy qazaqstandyqtardyń 94,9 paıyzy oń baǵalap otyr. 94,5 paıyzy ózin Qazaqstannyń birtutas halqynyń ókili dep sezinedi. Etnıkaaralyq saladaǵy memlekettik saıasatty elimiz azamattarynyń 95,7 paıyzy qoldap otyr», - dedi ol.

E. Toǵjanovtyń sózine qaraǵanda, ózge etnostardyń ókilderine qatysty toleranttylyq deńgeıi 83,7 paıyzdy qurady.

Áleýmettik saýalnama málimetteri boıynsha, elimiz azamattarynyń 89,5 paıyzy Qazaqstan halqy Assambleıasy Qazaqstan halqynyń múddesine jumys istep júrgenine senimdi.

«Bul jaı ǵana sandar emes. Osy baǵytta kúndelikti aýqymdy jumystar jasalýda jáne elimizdiń ár azamatynyń túsinistigin kórsetip otyr. Bul Memleket basshysy saıasatynyń salmaqty nátıjesi»,-dedi ol.

Aıta keteıik, ótken jyly QHA úsh mıllıon adamdy qamtı otyryp, on myńnan astam shara ótkizdi.