Elimizdegi energııa óndiretin nysandarda kómir qory 3,9 mln tonnaǵa jetti

NUR-SULTAN. QazAqparat – Elimizdegi bes stantsııada kómirdiń qory normatıv deńgeıinen az jınaqtaldy. Bul týraly Úkimet otyrysynda jylý berý maýsymyna daıyndyqty talqylaý kezinde Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Elektr stantsııalarynda otyn jınaqtaý jalǵasyp jatyr. Energııa kózderi qoımalaryndaǵy kómir qory 3,9 mln tonnany jáne 83 myń tonna mazýtty qurady, bul jalpy bekitilgen normalarǵa sáıkes keledi. Sonymen qatar 5 stantsııada kómirdiń normatıvtik qory sáıkes kelmeıdi», - dedi B. Aqsholaqov.

Osy oraıda Semeı JEO-1, Rıdder JEO, Shahtınsk JEO, Jezqazǵan JEO, Petropavl JEO-da kómir qoryn tolyqtyrý mindeti belgilendi.

Onyń aıtýynsha, byltyr jylý berý maýsymynyń basynda jyljymaly quramnyń jetispeýine baılanysty elimizdiń birqatar elektr stantsııalaryna kómir jetkizýde qıyndyqtar bolǵan.

Budan bólek mınıstr óńirlerge arnalǵan «áleýmettik mazýtqa» qatysty túsinik berdi. 2022 jylǵy tamyzda Energetıka mınıstrligi jergilikti atqarýshy organdardyń ótinimderine sáıkes, «2022-2023 jylǵy kúzgi-qysqy kezeńde áleýmettik-óndiristik nysandar men mekemelerge mazýt jetkizý boıynsha munaı jáne munaı ónimderiniń negizgi resýrs jınaqtaýshylaryna oblystar men Nur-Sultan, Almaty jáne Shymkent qalalary bekitildi. Osy oraıda mazýt 218,6 myń tonna kóleminde aıqyndaldy.

Budan buryn habarlanǵandaı, Energetıka mınıstri elektr stantsııalaryn jóndeý merzimderin oryndamaǵan óńirlerdi atady.