Elimizdegi eń jas kompozıtor Nuráli Beıseqojanyń shyǵarmashylyq keshi ótti
Ahmet Jubanov atyndaǵy daryndy balalarǵa arnalǵan respýblıkalyq Qazaq mamandandyrylǵan mýzyka mektep-ınternatynyń 55 jyldyǵyna arnalǵan kesh ıegeri Nuráli osy mektepte bilim alyp júr.
Eń jas kompozıtordyń shyǵarmashylyq keshine QR eńbek sińirgen qaıratkeri Gúlmıra Búıenbaeva basqaratyn Ahmet Jubanov atyndaǵy daryndy balalarǵa arnalǵan respýblıkalyq Qazaq mamandyrylǵan mýzyka mektep-ınternatynyń sımfonııalyq orkestri, Lázzat Júnisova men Almagúl Týbajanova jetekshilik etetin «Aq tilek» uldar hory, Halyqaralyq jáne Respýblıkalyq baıqaýlardyń laýreattary qatysty.
Mekteptiń 55 jyldyǵyna arnalǵan «Mektep valsi» atty shyǵarmasymen bastalǵan kontsert Nuráliniń «Kópten kútken kezdesý» atty týyndysymen jalǵasyn tapty. Álemdik klassıkadaǵy ataqty Antonıo Vıvaldı, Petr Chaıkovskıı, Iozef Gaıdn, Astor Pıatstsolla syndy kompozıtorlardyń izimen, janr ispettes qalyptasqan «Jyl mezgilderi» atty shyǵarmalar jelisimen jazylǵan Nuráliniń «Jyl mezgilderi. Qys. Kúz» týyndylary jas kompozıtordyń shyǵarmashylyq qarymynyń keń ekendigin baıqatty.
Álem chempıony, Sochı qalasynda ótken Olımpıada oıyndarynyń qola júldegeri, QR eńbek sińirgen sport sheberi, mánerlep syrǵanaýshy Denıs Tenge arnalǵan «Aqqan juldyz» týyndysy Nuráliniń qoǵamda bolyp jatqan jaıttarǵa beıjaı qaraı almaıtyn zerek ári sezimtal ekendigin baıqatady. Ol tek aspaptyq janrda ǵana emes, sonymen qatar án de jazady. Kontsertte onyń týǵan jerge arnalǵan «Qazaqstanym», «Atameken», ata-anasyna arnalǵan «Ákeshim», «Anashym» atty ánderi de oryndaldy.
Kontsertke jınalǵan kópshilik Nurálige rıza bolyp, alǵysyn jaýdyrsa, kásibı mýzykadaǵy aǵa býyn mamandar eń jas kompozıtordyń shyǵarmashylyq aıaqalysyna joǵary baǵa berdi.