Elimizdegi eń úzdik qazaqtildi ınternet saıttar anyqtaldy
Baıqaýǵa ǵalamtor keńistigindegi tájirıbesi keminde bir jyldy quraıtyn, qazaq tilinde aqparat taratatyn úkimettik emes, táýelsiz qoǵamdyq saıttar qatysty. Qazylar alqasy saıttardy mazmuny, qyzmet baǵyty, ınteraktıvtiligi, qazaq tili men ulttyq qundylyqtardyń dáriptelýi, patrıottyq taqyryptardyń úzdiksiz kóterilýi, kórkemdigi, ıdeıa ereksheligi, tartymdylyǵy sekildi talaptar boıynsha saralady.
Saıysqa respýblıkanyń barlyq aımaqtarynan 30-ǵa jýyq ótinim kelip túsken. Sonyń ishinen 17 saıt irikteý kezeńinen ótip, onyń 8-i túrli nomınatsııalar boıynsha jeńimpaz atandy.
Shara maqsaty - ınternet júıesindegi úzdik qazaqtildi resýrstardy anyqtaý men nasıhattaý jáne ınternet resýrstardyń sany men sapasyn jaqsartýǵa úles qosyp júrgen otandyq qazaqtildi saıttardy qoldaý.
«Bizdiń qor qoǵamdyq mańyzy bar jobalarǵa únemi qoldaý kórsetip keledi. Bul baıqaý ana tilimizdiń qazirgi ınternet tilimen sóıleýine múmkindik beredi. Baıqaýǵa qatysýshylardyń sany jyl sanap artyp otyr. Osymen úshinshi jyl uıymdastyrylyp otyrǵan básekege 100-den astam qazaq tildi saıt qatysty. Úzdik atanǵan saıttar qazaq tiliniń ǵana emes, elimizde túrli naqty jobalardy júzege asyrýǵa úles qosady dep sanaımyn», - dedi QR Tuńǵysh Prezıdenti - Elbasy qory atqarýshy dırektorynyń keńesshisi Álııa Qaısharova.
Sonymen, «Ótkir til» atalymy boıynsha - www.silteme.kz portaly, «Rýhanı azyq» atalymy boıynsha - www.sal-seri.kz portaly, «Shynaıy ómir» atalymy boıynsha - www.qazir.kz portaly, «Sport tynysy» atalymy boıynsha - www.argymaq.kz portaly, «Bilim bulaǵy» atalymy boıynsha - www.erýdıt.kz portaly, «Jastar álemi» atalymy boıynsha - www.univerlife.kz portaly, «Aımaq aınasy» atalymy boıynsha - www.mediaon.kz portaly, «Balalarǵa bazarlyq» atalymy boıynsha - www.dapter.kz portaly úzdik ınternet-saıt atandy.