Elimizdegi birneshe shahardan qala mártebesi alynyp, aýyl sanatyna aýysady

ASTANA. QazAqparat – Halyq sany 10 myń adamnan az qalalar aýyl sanatyna aýystyrylýy yqtımal. Mundaı usynys Ashyq NQA portalynda jarııalanǵan «Qazaqstanda jergilikti ózin-ózi basqarýdy damytýdyń 2025 jylǵa deıingi tujyrymdamasynda» jazylǵan, dep habarlaıdy QazAqparat tilshisi.

Qujatta ákimshilik-aýmaqtyq zańnama talabyna sáıkes kelmeıtin qalalardyń mártebesin ózgertý jumysy kezeń-kezeńimen iske asatyny baıandalǵan.

Ulttyq ekonomıka mınıstrliginiń dereginshe, mundaı qalalarǵa mynalar jatady:

- Stepnıak - Aqmola oblysy Birjan sal aýdanynyń ákimshilik ortalyǵy. Ondaǵy halyq sany – 3 800 adam;

- Temir - Aqtóbe oblysynyń Temir aýdanyna qarasty qala. Onda 2 100 adam turady;

- Jem - Aqtóbe oblysynyń Muǵaljar aýdanynda ornalasqan qala. Bul shaharda 1 500 turǵyn bar.

Vedomstvo atalǵan qalalarǵa eldi meken mártebesin berýdi usynǵanymen, basqa 17 iri aýyldy kerisinshe shaharǵa laıyq dep tanyp otyr.

«Іri 17 aýyl boıynsha olardyń aýyl mártebesine sáıkestigi týraly másele sheshýdi qajet etedi. Máselen, Mańǵystaý oblysyndaǵy Beıneý aýylynda - 54 myń adam, Túrkistan oblysyndaǵy Qarabulaq aýylynda - 50 myń adam, Almaty oblysyndaǵy Uzynaǵash aýylynda 47 myń turǵyn bar», - delingen tujyrymdamanyń ózgeris engizilgeli otyrǵan nusqasynda.

Qujat 26 qyrkúıekke deıin kópshilik talqylaýda bolady.