Elimizdegi benzın qory neshe kúnge jetedi
«Tamyz aıynda óndiriletin janar-jaǵarmaı kólemi eldiń ishki naryǵynda qajet kólemdi jabady. Munaı óńdeý zaýyttarynan jóneltilgen kólemdi eskere otyryp, 15 tamyzdaǵy jaǵdaı boıynsha eldiń munaı bazalarynda AI-92 markaly benzıniniń jıyntyq qaldyqtary 262 myń tonnany qurady. Bul kólem orta eseppen 19 kúnge jetedi, onyń ishinde MÓZ-degi qor – 12,1 myń tonna», - delingen mınstrlik málimetinde.
Sonymen qatar, AI-95 markaly benzıniniń qory 48 myń tonnany qurap, 16 kúnge jetedi. Sonyń arasynda munaı óńdeý zaýyttaryndaǵy qor 4,2 myń tonnany qurady.
«Bıylǵy tamyz aıynda 403 myń tonna AI-92 benzınin óndirý josparlanǵan. Jalpy, ishki naryqtaǵy suranys shamamen 380 myń tonna bolady dep eskerilgen. Tamyz aıynyń basyndaǵy 265 myń tonna kólemindegi qaldyqty eskere otyryp, otynnyń osy túriniń jalpy kólemi 668 myń tonnaǵa jetedi. Bul turǵyda qazirgi óndiris benzın boıynsha ishki suranysty tolyǵymen jabady. AI-92 qaldyǵy tamyz aıynyń sońynda 291 myń tonnanyń quramaq», - dep atalyp ótken vedomstvo aqparatynda.
Shymkent munaı óńdeý zaýytynda atqarylǵan jumystardy jáne osy zaýytta AI-95 óndirý bolmaǵanyn eskere otyryp, teńgerimdi saqtaý úshin AI-95 ımporty josparlanǵan bolatyn. Petrosan 70 myń tonna, Gazpromneft 12 myń tonnaǵa kelisimshart jasady. Tamyz aıynda ımport - 21 myń tonna.
Esterińizge sala keteıik, AI-95 markaly benzınine shekti baǵa boıynsha memlekettik retteý qoldanylmaıdy. Bul rette baǵa naryqtaǵy suranys pen usynys negizinde aıqyndalady.
Atap aıtqanda, bir lıtr AI-92 avtobenzıniniń shekti baǵasy memlekettik baǵa retteýge baılanysty 205 teńgeden aspaýy tıis.