Elimizdegi aýyl sharýashylyǵy maqsatyndaǵy jerdiń 98,8 paıyzy uzaqmerzimdi jaldaýda tur - E.Dosaev
Ulttyq ekonomıka mınıstri Erbolat Dosaevtyń aıtýynsha, zań jobanyń negizgi maqsaty aýyl sharýashylyǵy maqsatyndaǵy jerlerdi jeke menshikke berý tetigin engizý arqyly, olardy tıimdi ári utymdy paıdalanýdy qamtamasyz etý bolyp tabylady. «Qazirgi kúni elimizdegi aýyl sharýashylyǵy maqsatyndaǵy jerdiń 97,4 mln gektary nemese 98,8 paıyzy uzaqmerzimdi jaldaýda bolsa, tek 1,2 paıyzy ǵana jeke menshikte. Sonyń saldarynan aýyl sharýashylyǵy maqsatyndaǵy jerler naryqtyq aınalymǵa tartylmaǵan kúıinde qalyp otyr», - dedi mınıstr. Osyǵan baılanysty zań jobasynyń negizgi maqsaty aýyl sharýashylyǵy úshin paıdalanylatyn jerlerdi utymdy jáne tıimdi paıdalanýdy qamtamasyz etý bolyp tabylady. Bul rette jerlerdi jeke menshikke tabystaýdyń jańa tetikterin engizý qarastyrylady. Atap aıtqanda, aýyl sharýashylyǵy maqsatynda jerdi tıimdi paıdalaný úshin ony aýktsıon arqyly jeke menshikke satý kózdeledi. Bul rette memleket menshigindegi aýyl sharýashylyǵy maqsatyndaǵy jerler Qazaqstan azamattary men zańdy tulǵalaryna jeke menshiktik quqyqpen aýktsıon arqyly kezeńder boıynsha berilmek. «Bul rette, birinshi kezekte jer ýchaskesiniń kadastrlyq qunyn arttyrýdy kózdeıtin aýktsıon arqyly satylady. Osyǵan baılanysty aǵylshyndyq ádispen bolatyn eki aýktsıon arqyly ýchaske satylmasa, onda ol endi jer ýchaskesiniń kadastrlyq qunynyń elý paıyzyna tómendetiletin aýktsıonǵa qoıylatyn bolady. Bul jerdiń tolyqqandy naryqtyq quralǵa aınalýyna jáne aýyl sharýashylyǵynyń ótimdi aktıvi bolýyna jol ashady», - dep túsindirdi mınıstr Erbolat Dosaev. Onyń aıtýynsha, jalǵa berilgen jer ýchaskelerin satyp alý boıynsha jeńildik sharttary da qarastyrylady ári bul norma búgingi jalǵa alýshylardyń múddesine oraılastyrylady. Bul rette olarǵa budan buryn berilgen aýyl sharýashylyǵy jer ýchaskelerin paıdalaný quqyǵynyń merzimi aıaqtalǵanǵa deıin jeke menshikke jerdiń kadastrlyq qunynyń elý paıyzy mólsherine deıin aıqyndalatyn jeńildik baǵamen tóleý qarastyrylady. Bul tóleý merzimi keıinnen on jylǵa deıin uzartylý quqyǵy da kózdeledi.