Elimizdegi arhıvterdegi jabyq qorlardy ashý kerek - Berik Ábdiǵalıuly
«Búginde negizgi jumys arhıvterdiń jabyq qorlarynda júrgizilýi kerek. Bul baǵytta ǵalymdar kedergilerge tap bolyp otyr. Komıssııanyń arqasynda ruqsat qaǵazdaryn alǵanymen, áli de bizdiń vedomstvolardyń arhıvterinde kedergiler bar. Sondyqtan osyny sheshýdiń basty joly – ol qupııasyzdandyrý. Óıtkeni kóptegen qujattar keńestik kezeńde qupııalyqqa bekitilgen», - dedi depýtat Ortalyq kommýnıkatsııalar qyzmetinde.
Berik Ábdiǵalıulynyń aıtýynsha, qazirgi kezde Reseıde, Ýkraınada jáne burynǵy keńestik basqa da elderde keıbir qujattar ǵalamtorda, kitaptarda jarııalanyp jatyr. Al Qazaqstanda bul qajattar áli de qupııa kúıinde saqtalyp otyr.
«Qazirgi kezde mekemelermen kelisip, Bas prokýratýra, Joǵarǵy sot, Іshki ister mınıstrligi, Ulttyq qaýipsizdik komıtetimen birlesip, arnaıy komıssııalardy uıymdastyryp, birtindep kezeń-kezeńmen qupııasyzdandyrý júrgizý kerek. Bul tek ǵalymdar úshin emes, óz babalaryn izdep júrgen azamattarǵa da tanysýǵa jeńil bolar edi. Memlekettik komıssııasynyń sheshimimen osyndaı arnaıy komıssııa quryldy. Onda búkil tıisti ókiletti organdardyń músheleri bar. Endi josparyn jasap, jumysymyzdy bastaımyz. Óıtkeni búginde óńirlerde júmystar júrgizilip jatyr, degenmen oblystyq arhıvterde jabyq qorlar bar. Olar birtindep qazir ashylyp jatyr», - dedi depýtat.
Onyń sózine qaraǵanda, tek Іshki ister mınıstrliginiń ózinde 172 myń qujat pen is boıynsha jabyq qor bar.
Budan buryn habarlanǵandaı, QR Premer-Mınıstriniń orynbasary Eraly Toǵjanov Saıası qýǵyn-súrgin qurbandaryn aqtaý komıssııanyń mindetterin atady.
Sonymen qatar, QR Bilim jáne ǵylym mınıstri Ashat Aımaǵambetov saıası qýǵyn-súrgin qurbandaryn tolyq aqtaý baǵytynda jumys isteıtin ǵalymdar bekitilgenin aıtty.