Elimizdegi 471 gıdrotehnıkalyq qurylysty jóndeý qajet

ASTANA. QazAqparat – Elimizdegi 471 gıdrotehnıkalyq qurylysty jóndeý kerek. Bul týraly Ekologııa jáne tabıǵı resýrstar vıtse-mınıstri Ǵalıdolla Azıdýllın aıtty, dep habarlaıdy QazAqparat tilshisi.

«Respýblıkalyq balanstaǵy gıdrotehnıkalyq qurylystardyń tasqyn sýlardy ótkizýge daıyndyǵy týraly jaǵdaı kelesideı. Respýblıka aýmaǵynda barlyǵy 1 806 tirek gıdrotehnıkalyq qurylystar bar. Osy jyldyń qańtar aıyndaǵy jaǵdaı boıynsha 1 322 gıdrotehnıkalyq qurylys zertteldi. 471 nysan jóndeýdi talap etetini anyqtaldy. Onyń 327-si - kommýnaldyq menshikte. Mınıstrlik gıdrotehnıkalyq qurylys tasqyn sýlaryn qaýipsiz ótkizý jáne qajetti ınertti materıaldar men tehnıkany daıyndaý úshin jergilikti atqarýshy organdarǵa tıisti is-sharalardy ótkizý týraly usynymdar jiberildi», - dedi ol Ortalyq kommýnıkatsııalar qyzmetindegi baspasóz máslıhatynda.

Sonymen qatar Ǵalıdolla Azıdýllın «Qazgıdromet» sý tasqyny kezeńin boljaý jumystaryn qalaı júrgizetindigine toqtaldy.

«Qazgıdromet» RMK sý tasqyny kezeńine aldyn ala boljamdy 2023 jylǵy 1 aqpandaǵy jaǵdaı boıynsha 4 aqpanda shyǵardy. Odan ári sý tasqyny kezeńine negizgi boljamyn 5 naýryzǵa deıin usynady. Naýryz aıynan bastap gıdrologııalyq boljamyn apta saıyn usynady. «Qazgıdromet» RMK gıdrometeojaǵdaılar kúrt ózgergen kezde 2-3 táýlik buryn sý tasqyny qaýpi týyndaýy jaıly daýyldy eskertýlermen aldyn ala habardar etetin bolady», - dedi vıtse-mınıstr.