Elimizdegi 4 mádenıet uıymynyń shyǵyndaryn sýbsıdııalaý kólemi qysqarmaq

ASTANA. QazAqparat – Elimizdegi 4 mádenıet uıymynyń shyǵyndaryna memleket tarapynan tólenetin sýbsıdııa mólsheri azaıýy múmkin. Bul týraly Mádenıet jáne sport mınıstrligi ashyq talqyǵa shyǵarǵan buıryqta jazylǵan, dep habarlaıdy QazAqparat tilshisi.

«Teatr bıletteri baǵasynyń ósýine baılanysty aǵymdaǵy jyldyń ekinshi jartyjyldyǵynda Natalııa Sats atyndaǵy Orys memlekettik akademııalyq balalar men jasóspirimder teatrynyń óz tabysy ulǵaıdy. Osyǵan baılanysty óz qarajaty men respýblıkalyq bıýdjet qarajaty arasyndaǵy naqty araqatynasty belgileý maqsatynda shyǵystardy jabýǵa arnalǵan sýbsıdııalar mólsherin 90%-dan 85%-ǵa azaıtý usynylady», - dep kórselitgen qujatta.

Al «Roza Baǵlanova atyndaǵy «Qazaqkontsert» memlekettik kontserttik uıymyna beriletin sýbsıdııalar mólsherin 93 paıyzdan 91 paıyzǵa azaıtý usynyldy. Óıtkeni, atalǵan uıymnyń zaldy jalǵa berý esebinen óz tabysy artqan.

«2022 jylǵy qańtar aıynan bastap Qalıbek Qýanyshbaev atyndaǵy memlekettik akademııalyq qazaq mýzykalyq drama teatryna berilgen sýbsıdııalar - 93%, bul jıyntyq mánde 1,7 mlrd teńgeni qurady. Respýblıkalyq bıýdjetten jalaqyny ulǵaıtýǵa arnalǵan qarajattardyń bólinýine baılanysty sýbsıdııalar boıynsha paıyz ulǵaıý jaǵyna qaraı qaıta qaraldy - 95%, bul jıyntyq mánde 1,8 mlrd teńge. Osyǵan baılanysty usynylatyn paıyz 0,8%-ǵa artyq bolady. Joǵaryda atalǵandardy eskere otyryp, sýbsıdııalar mólsherin 95%-dan 94,8%-ǵa azaıtý usynylady.

QR Ulttyq mýzeıine bólingen sýbsıdııalar - 90%, bul jıyntyq mánde 1,5 mlrd teńge. Respýblıkalyq bıýdjetten jalaqyny ulǵaıtýǵa arnalǵan qarajattardyń bólinýine baılanysty sýbsıdııalar boıynsha paıyz ulǵaıý jaǵyna qaraı qaıta qaraldy - 95%, bul jıyntyq mánde 1,7 mlrd teńge. Sondyqtan usynylatyn paıyz 2,3%-ǵa artyq bolady. Osyny eskere otyryp, sýbsıdııalar mólsherin 95%-dan 94,8%-ǵa azaıtý usynylady», - delingen buıryqta.

Qujatty ashyq talqylaý 6 jeltoqsanǵa deıin jalǵasady.