Elimizdegi 188 mln gektar jaıylym jerdiń 43 paıyzy ǵana mal jaıýǵa qoldanylyp otyr

ASTANA. QazAqparat - Elimizde 188 mıllıon gektar jaıylymdyq alqap bolsa, sonyń 43 paıyzy nemese 80 mıllıon gektary ǵana mal jaıýǵa qoldanylyp otyr. Sonymen qatar, bul jerlerdiń kóbi aýyl mańyna jaqyn ornalasqan, al keıbir jaıylymdyq jerler belgisiz sebeptermen tıimsiz paıdalanylýda. Bul týraly búgin Májiliste jaıylymdardy tıimdi basqarý men paıdalaný máselelerine arnalǵan dóńgelek ústel barysynda málim boldy.

Jıyn barysynda keltirilgen málimetterge qaraǵanda, Qazaqstanda 188 mln. gektar jaıylymdyq jer bolǵanymen, onyń tek 43 paıyzy ǵana tıimdi paıdalanylyp otyr. Sonymen qatar, 27 mln. jaıylymdy alqap tozýǵa ushyrap otyr.

Májilistiń Agrarlyq máseleler komıtetiniń múshesi, depýtat Jeksenbaı Dúısebaevtyń aıtýynsha, tórt túlik maldyń basym kópshiligi aýyl mańyna jaqyn aýmaqtarda ustalady. Sonyń saldarynan ondaı jerlerdiń basym bóligi is júzinde búlinip, tozǵan. «Óıtkeni, qazirgi tańda 20 mıllıonnan astam mal basy, onyń ishinde halyqtyń jeke aýlasyndaǵy jáne sharýa qojalyqtarynyń menshigindegi maldar osy jerde jaıylady, tıisinshe, bul aımaqtaǵy maldyń tyǵyzdyǵy qoldanystaǵy normatıvten birneshe ese joǵary. Sonyń saldarynan, ıaǵnı jerdi tıimdi paıdalanbaý, burynǵy dástúrge saı jazda jaılaýlarǵa óristetý erejeleriniń buzylýynan jaıylymdyq jerler tapshylyqqa ushyraýda. Bul sonymen birge, mal sharýashylyǵyn jem-shóppen qamtamasyz etý jaǵdaıyn da naarlatyp tastady. Al nátıjesinde aýyl sharýashylyǵy taýaryn óndirýshiler bir jaǵynan mal basyn ósire almaı, ekinshi jaǵynan qolda bar maldyń ónimdiligin arttyra almaı keledi. Mine, osynyń ózi respýblıkamyzdaǵy mal sharýashylyǵynyń tutastaı rentabeldiligine keri áser etýde», - dedi J. Dúısebaev.

Onyń sózine qaraǵanda, atalǵan kedergiler zań sheńberinde naqty rettelmegendikten qalyptasyp otyr. Osyǵan baılanysty keıbir aımaqtarda jaıylym jetispeýshiligi kúrdelene túsýde.