Elimizdegi 100-ge tarta kompanııa energoaýdıtten ótkizilýde - A. Raý
«Elbasy aıqyndaǵan Ult josparynyń 59-y qadamynda energoservıstik kelisimsharttardy jasaı otyryp, energııa únemdeý salasyna ınvestorlar tartý júktelgen bolatyn. Energııa únemdeý máselesi kez kelgen eldiń ekonomıkasy úshin asa mańyzdy, básekege qabilettilik quramdasy bolyp tabylady. Jalpy alǵanda, birinshi besjyldyq aıasynda Memleket basshysynyń energııa únemdeýge qatysty júktegen tapsyrmalaryn oryndaýǵa kiristik. Tarıhta tuńǵysh ret energııa únemdeýge maqsatty túrde kiristik desek te bolady. Máselen, birinshi besjyldyqta Elbasy ishki jalpy ónimdegi energııalyq syıymdylyqty on paıyzǵa tómendetýdi tapsyrdy, bul mindet artyǵymen oryndaldy. Makroekonomıkalyq kórsetkishter arqasynda ІJÓ ósiminiń energoresýrstardy tómen deńgeıde tutyný nátıjesinde bul kórsetkishti 18 paıyzǵa deıin tómendettik», - dedi A. Raý.
Vıtse-mınıstrdiń aıtýynsha, Qazaqstanda jańadan iske qosylyp jatqan nysandar energııa tıimdiligin arttyrýdyń barlyq standarttaryna saı atqarylyp, energııa únemdeý qondyrǵylary josparǵa saı oryndalyp keledi. Eń bastysy Albert Raýdyń aıtýyna qaraǵanda, birinshi besjyldyqta energııa únemdeýdiń jan-jaqty júıesi qalyptasty.
«Bul úshin memlekettik energetıkalyq reestr júrgizile bastady, oǵan barlyq memlekettik mekemeler men qosa jylyna 1 500 tonna otyn tutynatyn 7 myńnan astam sýbektiler engizilgen. Bul nysandar ózderiniń ónimderi úshin qansha energııa resýrsyn tutynyp otyrǵanyn kórsetýleri shart.
«Memlekettik reestrge engizilgen sýbekt energııa tıimdiligi aýdıtin ótkizýi kerek. Búgingi kúni ondaı aýdıt ótkizetin ınstıtýt qalyptasty. Qazirgi tańda shamamen 100 kompanııa akkredıtatsııadan ótip, energoaýdıt júrgizýge kóshti. Energoaýdıt negizinde árbir kompanııa óziniń aldaǵy josparlaryn qalyptastyrýǵa mindetti bolady», - dedi Albert Raý.