Elimizdegi 10 aımaqta aýa sapasy nashar – vıtse-mınıstr

NUR-SULTAN. QazAqparat – Elimizdegi 10 aımaqta aýa sapasy nashar. Bul týraly Ekologııa, geologııa jáne tabıǵı resýrstar vıtse-mınıstri Zúlfııa Súleımenova málim etti, dep habarlaıdy QazAqparat tilshisi.

«Qazaqstannyń 45 ónerkásiptik aımaǵyndaǵy aýanyń lastaný deńgeıine monıtorıng júrgizildi. Nátıjesinde 10 aımaqta aýa sapasy nashar ekeni anyqtaldy.Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan jáne Shymkent qalalarynda aýanyń lastaný deńgeıi óte joǵary. Oǵan úsh negizgi faktor áser etedi. Máselen, Nur-Sultan men Almatyda jylytý elektrostantsııalary aýaǵa zııandy qaldyqtardy kóp mólsherde bóledi. Temirtaý men Óskemende ekologııaǵa iri kólemde zııan keltiretin – ol ónerkásip. Al batys óńirlerde eskirgen káriz júıeleri aýany lastap otyr», – dedi vıtse-mınıstr.

Zúlfııa Súleımenovanyń dereginshe, óńirlerdegi ekologııa ahýalyn jaqsatrý úshin 16 jol kartasy ázirlengen.

«Jol kartasyna sáıkes, 485 is-shara uıymdastyrý josparlanǵan. 2020 jyldan 2022 jyldyń birinshi toqsanyna deıin belgilengen jumystar 50%-ǵa aıaqtaldy. Osy sharalardyń nátıjesinde 2025 jylǵa qaraı 10 aımaqtaǵy ekologııanyń lastaný deńgeıi tómendeıdi dep boljap otyrmyz», - dep atap ótti Zúlfııa Súleımenova.

Elimizde aýanyń lastanýyna sebepshi bolyp otyrǵan iri 16 kásiporyn bar. Vıtse-mınıstrdiń aıtýynsha, atalǵan kompanııalar óz qarajattary esebinen zııandy qaldyqtar mólsherin 20-30%-ǵa deıin azaıtýǵa mindetteldi.