Elimizde jyl basynan beri 39 adam áýereısterinen túsirildi
Elimizdiń kólik polıtseıleri osy jyldyń basynan beri túrli ákimshilik quqyq buzýshylyq jasaǵan 39 azamatty áýereısterden túsirdi, onyń 16-sy alkogoldik ishimdikter ishkeni nemese qoǵamdyq oryndarda masań kúıinde bolǵany úshin, 5-ýi áýe kemesinde minez-qulyq qaǵıdalaryn buzǵany úshin jáne taǵy da basqa teris qylyqtar úshin túsirilgen.
Bul týraly kóliktegi polıtsııa departamenti ákimshilik polıtsııa basqarmasynyń bastyǵy Dáýlet Moldahanov habarlady. Onyń aıtýynsha, Astana qalasy áýejaıyndaǵy jelilik polıtsııa bólimine FlyArystan áýekompanııasynyń ókilderinen «Túrkistan – Astana» baǵytyndaǵy reıstiń jolaýshysyna qatysty shara qabyldaý týraly habarlama tústi. Áýe kemesi Astanaǵa ushyp kelisimen jolaýshy áıel akt boıynsha polıtseılerge berildi.
«Tekserý barysynda kólik saqshylary masań kúıinde bolǵan jáne ushaq bortyndaǵy qaýipsizdik erejelerine baǵynbaǵan Túrkistan qalasynyń 37 jastaǵy turǵynyn anyqtady. Quqyq buzýshyǵa qatysty QR ÁQBtK-niń 440-baby 1-bóligi jáne QR ÁQBtK-niń 566-baby 1-bóligi boıynsha eki ákimshilik hattama toltyrylyp, 8 aılyq eseptik kórsetkish (27 600 tg) mólsherinde aıyppul salyndy», - dedi D.Moldahanov.
Esterińizge sala keteıik, azamattardyń áýe kemesiniń bortynda minez-qulyq erejelerin buzýy qalǵan jolaýshylarǵa qolaısyzdyq keltirip qana qoımaı, ushý qaýipsizdigine qaýip tóndirýi múmkin.
Foto: polisia.kz