Elimizde jumysshylardyń quqyqtaryn qosymsha qorǵaýǵa qatysty jańa normalar engizildi
Bul qujat eńbek daýlaryn retteý jáne kelissózder protsesterin uıymdastyrý máseleleri boıynsha eldiń zańnamasyn jetildirý úshin ázirlendi. Jańa túzetýler kelisim komıssııasynyń qyzmetine, ujymdyq eńbek daýlaryn sheshýdegi kásipodaqtardyń rólin naqtylaýǵa, jınalystar nemese eskertý ereýilderi ótkizilýi múmkin jaǵdaılarǵa jáne basqa da tıisti jaıttarǵa qatysty máselelerdi qamtıdy.
«Atalǵan Zań aıasynda Qazaqstan Respýblıkasynyń Eńbek kodeksine jáne «Kásiptik odaqtar týraly» Zańdaryna ózgerister men tolyqtyrýlar engizilip otyr. Zańnyń negizgi maqsaty – eńbek janjaldaryn retteý jáne kelissózder protsesterin uıymdastyrý máseleleri boıynsha zańnamany jetildirý. Zańda kelisý komıssııalaryn qalyptastyrý jáne Eńbek tóreligin qurý tártibin, olardyń qyzmetin jetildirý kózdelgen. Osy oraıda eńbek daýlaryn qaraý merzimderi qysqartyldy, kelissózder protsesterin uıymdastyrý, talaptardy tujyrymdaý jáne usyný rásimderin jeńildetildi, kásiptik odaqtardyń róli kúsheıtildi. Bul óz kezeginde quqyqtyq saladaǵy eńbek janjaldaryn sheshýge yqpal etedi dep senemiz», - dedi senator Aqmaral Álnazarova
Onyń aıtýynsha, zańdy qabyldaý teris jáne ózge de jaǵymsyz áleýmettik-ekonomıkalyq jáne quqyqtyq saldarǵa ákep soqtyrmaıdy.
Óz kezeginde Senat tóraǵasy Máýlen Áshimbev Memleket basshysy eńbek daýlaryna qatysty quqyqtyq qatynastardy qosymsha retteý máselesin birneshe ret kótergenin eske saldy.
«Soǵan sáıkes ázirlengen bul zań osy saladaǵy otandyq zańnamany jetildirýdi kózdeıdi. Jalpy, daýlardy retteýdiń balamaly tásilderin qoldaný – quqyqtyq saıasatty damytýdyń mańyzdy baǵyttarynyń biri. Osy zań arqyly jeke jáne ujymdyq eńbek daýlaryn qaraý tártibi qaıta qaralady. Sondaı-aq kelisý jáne tatýlastyrý komıssııasynyń mártebesi kúsheıe túsedi. Aldaǵy ýaqytta jańa normalar jumysshylardyń quqyqtaryn qosymsha qorǵaýǵa jáne eńbek daýlaryn azaıtýǵa yqpal etedi dep senemiz», – dedi Senat tóraǵasy.