Elimizde jumysshylardyń quqyqtary zań júzinde óte jaqsy qorǵalǵan, biraq kelispeıtin tustary bar - ǵalym pikiri
Bul týraly búgin elordada «Áleýmettik-eńbek janjaldary: olardy retteýdiń formalary men ádisteri» taqyrybynda ótken dóńgelek ústel barysynda L.Gýmılev atyndaǵy Eýrazııa ulttyq ýnıversıtetiniń dotsenti Ǵazızat Imaqova aıtty.
Onyń paıymynsha, elimizdegi óndiris salasynyń damý qarqyny alda kele jatyr, al osy salalarda oryn alatyn eńbek daýyna qatysty jaıttardy kelissózder arqyly sheshýi máselesi kenjelep otyr. Degenmen, bul rette ótken jyly qabyldanǵan «Medıatsııa týraly» zańda eńbek daýy kezinde týyndaǵan kelispeýshilikterdi sheshýdiń negizgi prıntsıpteri men kelissózderdi úılestirý, kelistirý sharalary qaralǵan. «Biraq ókinishke oraı bizde áli kúnge deıin qoǵamdyq ǵylymdar osyǵan ere almaı kele jatyr. Eger de ǵylym men qoldanbaly tájirıbe arasyndaǵy is-áreket baılanysy tyǵyz bolǵanda buǵan bizdiń áleýetimizdiń jetýi múmkin edi», - dedi ol.
Sonymen qatar Ǵ.Imaqovanyń atap ótýinshe, qazirgi ýaqytta qoǵamdyq ǵylymdar men óndiristik salalar arasyndaǵy ekonomıkalyq múddelerdi, jumysshy men jumys berýshilerdi kelispeýshilikterdi sheshýde zańda júıelengen normalardy paıdalaný áleýeti kemshin túsýde.
«Ókinishke oraı, shyn máninde jumysshylardyń quqyqtary zań júzinde óte jaqsy qorǵalǵanymen is júzinde onyń óte kóp kelispeıtin jaǵdaılary bar. Jalpy zań men is-júzindegi ara qatynas óte alshaq bolyp tur. Bul qoǵamnyń saıası áleýetiniń, saıası saýattylyq dárejesiniń sáıkestenbeýinen oryn alǵan másele», - dedi ǵalym.