Elimizde jumys istegisi kelmeıtin adamdardyń sany artyp barady - Prezıdent

NUR-SULTAN. QazAqparat – Memleket basshysy Qasym-Jomart Toqaevtyń oıynsha, elde patronalıstik kóńil-kúı artyp keledi, dep habarlaıdy QazAqparat tilshisi.

«Memleket muqtaj azamattardy qoldaý baǵytyndaǵy jumysty jalǵastyryp jatyr. Biraq, qabyldanǵan sońǵy sharalar tıimdi boldy deı almaımyz. Osynyń saldarynan patronalıstik kóńil-kúıdiń aıtarlyqtaı ósip ketkenin baıqap otyrmyz. Sońǵy 5 jylda ataýly áleýmettik kómek alýshylar sany Qazaqstanda 70 myńnan jarty mıllıon adamǵa deıin kóbeıdi. Áleýmettik qoldaýǵa baǵyttalǵan bıýdjet qarajatynyń kólemi 2017 jyldan beri 17 ese ósti. Basqasha aıtqanda, jumys istegisi kelmeıtin adamdardyń sany artyp barady. Eń jamany, olar áleýmettik kómek alý úshin óz tabysyn jasyrady. Aýqatty adamdardyń ataýly áleýmettik kómek alyp kelgeni týraly BAQ-ta jarııalandy», - dedi Memleket basshysy Qazaqstan halqyna Joldaýynda. Prezıdent Qazaqstannyń Konstıýtsııa boıynsha áleýmettik memleket ekenin qaıtara atap ótti. «Sol sebepti memleket óz azamattary aldyndaǵy mindettemelerin oryndaýy tıis. Úkimet óz mindetin oryndaý kezinde osy qaǵıdatqa súıenýi kerek», - dedi ol.