Elimizde jumyrtqa men kúnbaǵys maıyna shekti baǵa engizildi

NUR-SULTAN. Qaz-Aqparat – Іshki naryqta álemdik baǵa ósiminiń áserin azaıtý maqsatynda ishki naryqty otandyq taýarlarmen tolyqtyrý jumysy júrip jatyr. Bul týraly Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Baǵany turaqtandyrý sheńberinde múddeli memlekettik organdar jedel sharalardy qoldanýda. Mysaly, jumyrtqa men kúnbaǵys maıyna shekti baǵa engizildi. Osyndaı ákimshilik shara qoldanýǵa májbúr boldyq. Turaqtandyrý qorlarynda 7,1 mlrd teńge somasynda 57 myń tonna azyq-túlik qalyptastyrylyp jatyr. Aınalym shemasy aıasynda jeńildetilgen nesıege 28 mlrd teńge bólindi. Jaqyn arada taǵy 4 mlrd teńge bólý kózdelip otyr. Onyń 3,7 mlrd teńgesine 36 myń tonna azyq-túlik qoryn satyp alý týraly kelisimshart jasaldy», - deıdi Baqyt Sultanov.

Onyń aıtýynsha, ishki naryqta álemdik baǵa ósiminiń áserin azaıtý maqsatynda ishki naryqty otandyq taýarlarmen tolyqtyrý jumysy júrip jatyr.

«Saýda jáne ıntegratsııa, Aýyl sharýashylyǵy, Qarjy mınıstrlikteri jergilikti atqarýshy organdarmen birlesip, áleýmettik mańyzy bar taýarlardyń naqty túrleri men kólemin bekitedi», - deıdi ol.