Elimizde jetekshi áýe kompanııalary birnesheý bolyp bólinýi múmkin

ASTANA. QazAqparat – Otandyq áýe qatynasy naryǵynda shoǵyrlanýdy azaıtyp, básekeni arttyrý úshin jetekshi áýe kompanııalaryn bólý qarastyrylyp jatyr. Bul týraly Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov málim etti, dep habarlaıdy QazAqparat tilshisi.

«Azamattyq avıatsııa naryǵynda joǵary shoǵyrlaný baıqalady. «Eır Astana» kompanııasy qyzmetine memlekettiń qatysý úlesi - 76%. Bul ashyq aspan rejımin retteıtin aqparattyń shektelýine, avıaotyn satýshylar arasynda básekeli ortanyń bolmaýyna, joǵary baǵa, otyn jetispeýshiligine jáne áýejaıdy paıdalanýshylar tarapynan shekteýlerge ákelip otyr», - dedi Rýstam Ahmetov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, agenttik joǵaryda atalǵan máseleni sheshý boıynsha birqatar is-sharany qarastyryp otyr.

«Aldymen áýekompanııa aktıvterin jekeshelendirý naryǵynda memlekettiń qatysý deńgeıin tómendetý, áýe qatynasy naryǵynda shoǵyrlanýdy azaıtyp, básekelestikti arttyrý úshin jetekshi avıakompanııalardy bólý, sheteldik tasymaldaýshylardy tartý úshin 2028 jylǵa deıin ashyq aspan rejıminiń merzimin ulǵaıtý jáne avıaotyn satýshylar men áýejaılar arasynda básekeli orta qurýdy kózdep otyrmyz», - deıdi ol.