Elimizde jeńil ónerkásip salasynda óndiris kólemi ósti
Jeńil ónerkásip salasynyń ishinde, toqyma buıymdary óndirisi 8,7%, kıim-keshek óndirisi 5,2%, sondaı-aq bylǵary jáne oǵan jatatyn ónimder óndirisi 5,9% ósim kórsetti.
«Bul ósimge maqta talshyǵy, daıyn toqyma buıymdary, syrtqy kıim, aıaq kıim óndirisin ulǵaıtý, sondaı-aq «Bal tekstıl» JShS kilem jáne kilem buıymdary óndirisi boıynsha úshinshi tsehyn, «QazProdGroup» JShS aıaq kıim óndirisin, «EKOHIM» JShS jipter, sıntetıkalyq jipter, baýlar, jelilerdi órý, arqan-jip buıymdaryn óndirý jobalaryn 2019 jyly iske qosý esebinen barlyq kishi salalarynda baıqaldy», delingen habarlamada.
Búgingi tańda jeńil ónerkásip salasyn damytý – basym baǵyttardyń biri bolyp otyr. Óıtkeni, salanyń halyqty jumyspen qamtýda áleýmettik mańyzy zor.
2015-2019 jyldary Indýstrııalandyrý kartasy aıasynda jalpy somasy 19 mlrd teńgeniń 22 jobasy iske qosyldy. 1 732 jumys orny ashyldy. Jeńil ónerkásip óndirisi kólemi 2015 jyly 71,6 mlrd teńge bolsa, 2019 jyly ol 112,7 mlrd teńgege jetti.
Sonymen qatar, «Qarapaıym zattar ekonomıkasyn» nesıeleý tetigi aıasynda ekinshi deńgeıli bankter 6,6 mlrd teńge somasyna 30 jeńil ónerkásip jobasyn maquldady.
«Qazirgi ýaqytta jeńil ónerkásip kásiporyndaryn qoldaý ónim eksportyn damytý, eńbek ónimdiligin arttyrýdy yntalandyrý, taýarlardy ishki naryqqa ilgeriletý, «Bıznestiń jol kartasy 2020« baǵdarlamasy sııaqty óńdeý ónerkásibin damytýǵa baǵyttalǵan júıeli sharalar sheńberinde kórsetiledi. Budan basqa, mınıstirlik Jeńil ónerkásipti damytý jónindegi 2019-2021 jyldarǵa arnalǵan jol kartasyn ázirlep, ony Úkimet maquldady», delingen habarlamada.
Jeńil ónerkásibiniń taýarlary 2019 jylǵy 1 shildeden bastap memlekettik satyp alýlar aldyn ala biliktilik suryptaýmen konkýrs tásilimen ótkiziletin taýarlar, jumystar men qyzmetter tizbesine engizildi. Memlekettik satyp alýda aldyn ala biliktilik irikteýden ótken kezde Indýstrııalyq sertıfıkat berý qarastyrylǵan.
Budan bólek, kıim men aıaq kıimdi mindetti tańbalaý jáne baqylaý boıynsha pılottyq joba iske qosyldy. Qazirgi ýaqytta osy baǵytta jol kartasy men ádistemelik usynystar ázirlendi.
«Qazir maqta-toqyma klasterin qurý boıynsha Jol kartasy ázirlendi. Ol maqta talshyǵyn qaıta óńdeýdi 2 ese ulǵaıtýdy kózdeıdi. Sondaı-aq jeńil ónerkásip kásiporyndary paıdalanatyn shıkizatqa (matalar, jipter, fýrnıtýra jáne t.b.) kedendik ákelý bajdaryn tómendetý máselesin sheshý mindeti tur», delingen habarlamada.