Elimizde jekeshelendirilýi tıis 227 nysan satylǵan

NUR-SULTAN. QazAqparat – QR Qarjy mınıstri Erulan Jamaýbaev jekeshelendirý keshendi jospary qalaı júrip jatqanyn aıtty, dep habarlaıdy QazAqparat tilshisi.

«Jekeshelendirýdiń 2021-2025 jyldarǵa arnalǵan keshendi josparynda 721 nysandy satý kózdelgen. Bıylǵy 4 aıda jalpy sany 670 nysannan somasy 61 mlrd teńgege 227 nysan satyldy jáne keıinnen satyp alý quqyǵymen senimgerlik basqarýǵa berildi», - dedi E. Jamaýbaev Úkimettiń búgingi otyrysynda.

Onyń aıtýynsha, qazirgi ýaqytta 40 nysan satylýǵa qoıyldy, 36 nysan qaıta uıymdastyryldy jáne taratyldy.

162 nysan satý aldyndaǵy daıyndyqta tursa, 205 nysan boıynsha taldaý júrgizilip jatyr.

Buǵan deıin Qarjy mınıstri jyl basynan beri respýblıkalyq bıýdjetten 5,6 trln teńge jumsalǵanyn jáne 8 mlrd teńge únemdelgenin aıtqan edi.

Sondaı-aq bıylǵy 4 aıda memlekettik bıýdjetke 5 trln 93 mlrd teńge kiris túsken jáne jospar 108,6%-ke oryndalǵan.