Elimizde jeke brondy qorǵanys quraldarynyń synaq zerthanasy qurylmaq
«Qazir memlekettik organdar Qaraǵandy oblysyndaǵy «Steel Manufacturing» JShS qazaqstandyq patron zaýytynyń bazasynda jeke brondy qorǵanys quraldarynyń (brondy jıletter men dýlyǵalar) synaq zerthanasyn qurý máselesin pysyqtap jatyr. Aldyn ala taldaýǵa sáıkes, seriktestiktiń qolynda bar ınfraqurylym (50 m, 100 m jáne 200 m-lik ballıstıkalyq zerthana, zerthanalyq jabdyqtar – sorǵy shkaf, beriktilikti ólsheýge arnalǵan aspap, RN ólshegish, metallýrgııalyq mıkroskop, spektrometr jáne t. b.) úlken qarjylyq shyǵyndarǵa júginbeı-aq jeke brondy qorǵanys quraldarynyń synaq ortalyǵyn uıymdastyrýǵa múmkindik beredi», - dedi Álıhan Smaıylov.
Onyń dereginshe, atalǵan seriktestiktiń ınfraqurylymy shamamen 100 mln teńgeni únemdeýge múmkindik beredi.
«Bıýdjetti qalyptastyrý rásimin, jabdyqty satyp alý jáne akkredıtteýden ótý rásimderin eskere otyryp, jobany iske asyrýǵa 2024 jyly kirisý josparlanǵan», - dedi Úkimet basshysy.