Elimizde jaz kezinde jol-kólik oqıǵalarynyń sany ósýi múmkin

ASTANA. QazAqparat – Oblys ortalyqtarynda joldaǵy ereje buzý derekteriniń jartysynan kóbi avtomatty tirkeý quraldary arqyly anyqtalyp jatyr. Bul týraly elordada joldaǵy qaýipsizdik salasynda jańa tehnologııalardy paıdalaný taqyrybyndaǵy forýmda QR Іshki ister mınıstriniń orynbasary Igor Lepeha aıtty, dep habarlaıdy QazAqparat tilshisi.

«Jyl saıyn halyqaralyq tranzıt aǵyny da ósip keledi. Jaz kezinde elimizge ózderiniń kóligimen saparlap keletin shetel azamattary kóbeıedi. Elimizdiń azamattary da basqa óńirlerge kýrortqa barady. Bul turǵyda joldaǵy apat kúrt ósýi múmkin. Joldaǵy apat sanyn tek polıtsııa kúshimen azaıtý múmkin emes», - dedi Igor Lepeha.

Osy oraıda ol elimizdiń aýqymdy aýmaǵyn eskere otyryp, polıtseıler patrýlin ár joldyń boıynda jıi qoıý múmkin emes ekenin aıtty.

«Sonymen qatar, qazir polıtseılerdiń biraz fýnktsııalary qysqarǵan. Bul turǵyda polıtsııa qyzmetkerlerine kólikti sebepsiz toqtatýǵa tyıym salǵanbyz. Jol erejesin buzǵan jaǵdaıda ǵana toqtatady. Sondyqtan joldaǵy kólik qozǵalysyn qadaǵalaýdyń barlyq protsesin tsıfrlandyrý aıasynda tıisti ońtaıly sheshimder bolýy kerek. Atap aıtqanda, osyǵan deıin bul salada biraz oń qadamdar jasaldy. Qazirgi kezde oblys ortalyqtarynda joldaǵy ereje buzý derekteriniń jartysynan kóbi avtomatty tirkeý quraldary arqyly anyqtalyp jatyr», - dedi Igor Lepeha.

Budan buryn habarlanǵandaı, keıingi 12-15 jylda avtokólik sany 3 mln-nan 5 mln-ǵa deıin artty.

Sonymen qatar, I. Lepeha elektr samokattyń jyldamdyǵy saıabaq aýmaǵynda avtomatty túrde báseńdeýi kerek ekenin aıtty.