Elimizde jarty mıllıonnan asa adam ulttyq sport túrlerimen aınalysady
Dańqty sportshylar, sport federatsııay basshylary bas qosqan jıynda baıandama jasaǵan Mádenıet jáne sport mınıstri Ashat Oralovtyń atap ótýinshe, dene shynyqtyrý jáne sport salasyndaǵy memlekettik saıasattyń strategııalyq maqsattary men mindetteri, sondaı-aq salany damytýdyń ózekti máseleleri men olardy iske asyrý tetikteri sala damytýdyń 2030 jylǵa deıingi tujyrymdamasynyń jobasynda aıqyndalǵan.
Qujat jobasynda Memleket basshysynyń tapsyrmalary, «Deni saý ult» ulttyq jobasynyń barlyq kórsetkishteri men is-sharalary ıntegratsııalanǵan.
Sondyqtan vedomstvonyń aldynda tujyrymdama jobasynyń ázirlenýin aıaqtaý ári qujattyń qabyldanýyn jyldamdatý mindeti tur.
Muny is-sharaǵa qatysqan Premer-Mınıstrdiń orynbasary Altaı Kólginov te basa aıtty.
«Sportty damytýǵa arnalǵan jańa tujyrymdamany jedeldetýimiz qajet. Bul jańa tujyrymdamada búkil kórsetkishter, aldymyzda turǵan maqsat-mindetter kórsetilýi tıis. Ásirese, jasóspirimder, jastardy sportqa baýlý, onyń ishinde kásibı sportshylarymyzdy damytý máseleleri qamtylýy qajet. 2023, 2024 jyldary, jalpy aldaǵy 7 jyldyq merzimde qandaı nátıjege qol jetkizýimiz kerektigi tujyrymdamada belgilenýi kerek», - dedi Úkimet basshysynyń orynbasary.
Aıta keterligi, atalǵan qujatta azamattardy jappaı túrde sportpen jáne dene shynyqtyrýmen shuǵyldanýǵa yntalandyrý, sporttyq marafondar, buqaralyq sportty damytý is-sharalaryn uıymdastyrýdy júıeli qolǵa alý kózdelgen.
Ashat Oralovtyń atap ótýinshe, dene shynyqtyrý jáne sport salasynda qoldanystaǵy normatıvtik-quqyqtyq baza zamanaýı ınnovatsııalyq jáne ıntegratsııalyq protsester talaptaryna tolyǵymen saı kelmeıdi, salanyń shynaıy qajettiligin eskermeıdi.
Sondyqtan bul baǵytta mınıstrlik zańnamalyq aktilerge túzetýler engizý jumysyn bastap otyr. Zań jobasy aıasynda kásibı sportty qarjylandyrý máselelerin retteý, sport mektepteri jattyqtyrýshy-oqytýshylarynyń normatıvtik oqý júktemesin aptasyna 24 saǵattan 18 saǵatqa deıin tómendetý josparlanǵan.
«Memleket basshysy atap ótkendeı, «bizdiń barlyq kúsh-jigerimiz qazaqstandyqtar ómiriniń qaýipsiz ári barynsha sapaly jaǵdaıyn qamtamasyz etýge baǵyttalýy tıis». Osy turǵyda biz sportshylardy, bapkerlerdi áleýmettik qorǵaý, múmkindigi shekteýli sportshylarǵa jaǵdaı jasaý jáne ózge de máselelerdi qozǵaımyz. Zań jobasyn jyldyń sońyna deıin Parlamentke engizý qajet», - dedi mınıstr.
Osy oraıda vıtse-premer sport máselesi boıynsha ázirlenetin zań jobasynda balalar sportyn damytý máselesine erekshe nazar aýdarylýy tıistigin atap ótti.
«Aldymyzda dene shynyqtyrýmen aınalysatyn balalar sanyn 2 esege arttyrý mindeti tur. Bul bizdiń qolymyzdan keletin mindet. Ol úshin birlesip jaǵdaı jasaýǵa tıispiz. Memlekettik sporttyq tapsyrysty tııanaqty iske asyrý mańyzdy. Osynda aıtylǵan usynystardy jan-jaqty pysyqtaý qajet. Bireýler básekelestikke jol berý kerektigin aıtty. Ol da durys. Kemshilikter bar. olardy da sheshý qajet. Munyń bárin jergilikti atqarýshy organdarmen pysyqtańyzdar. Sodan keıin tıisti sheshim qabyldaý kerek», - dedi Altaı Kólginov.
Mádenıet jáne sport mınıstriniń atap ótýinshe, bıyldan bastap mektep-ınternattyń jattyqtyrýshy-oqytýshylaryna sanattar úshin olardyń biliktiligine baılanysty 6 myńnan 22 myń teńgege deıin ústemeaqy engizildi.
Jetekshi dıetolgtermen jáne nýtrıtsıologtermen birge respýblıkalyq barlyq mektep-ınternattar úshin sport túrleriniń erekshelikteri, júkteme, jumsalatyn kılokalorıı eskerile otyryp, jas sportshylarǵa biryńǵaı as máziri ázirlendi.
Úsh kásip boıynsha sport salasyndaǵy kásibı standart bekitildi jáne jyldyń sońyna deıin 8 kásip boıynsha standart ázirlenedi.
Sonymen qatar jyldyń sońyna deıin sala mamandary úshin halyqaralyq tájirıbe eskerile otyryp, biliktilik talaptary ózgertiledi.
«Buǵan qosa, jattyqtyrýshy-oqytýshylarǵa topqa jetekshilik jasaǵany jáne sportshyny joǵary sporttyq uıymdarǵa bergeni, sondaı-aq sporttyq ataqtar úshin ústemeaqylardyń jańa túrlerin engizýdi josparlap otyrmyz. Sala qyzmetkerlerin áleýmettik qoldaý is-sharalary boıynsha usynystardy jyldyń sońyna deıin múddeli memlekettik organdarmen pysyqtaýdy tapsyramyn», - dedi Ashat Oralov.
Mınıstr kelesi mindet – sporttyq ınfraqurylymdy damytýjáne onyń qoljetimdiligin arttyrý ekendigine toqtaldy. Ol úshin mynadaı máselelerdi sheshý josparlanǵan.
Birinshiden, elimizdegi barlyq sport ınfraqurylymyna aýqymdy túgendeý júrgiziledi.
Ekinshi, sport nysandaryn esepke alý ádistemesine ózgerister engiziledi.
Úshinshi, sport ınfraqurylymynyń biryńǵaı tizilimi jasaqtalady.
Tórtinshiden, aýyldyq jerlerde tez salynatyn, shyǵyn az modýldik nysandar qurylysy qolǵa alynady.
Este bolsa, ótken jyly Memleket basshysy Qasym-Jomart Toqaev sport zaldary tapshylyǵyn joıý maqsatynda sport nysandaryn salý, jańǵyrtý jáne jabdyqtaý týraly tapsyrma bergen bolatyn.
Osy tapsyrma aıasynda 2025 jylǵa deıin elimizdiń aýmaǵynda 113 jańa sporttyq keshen salynýy tıis. Jalpy, halyqty sporttyq ınfraqurylymmen qamtamasyz etý – salanyń negizgi ındıkatorlarynyń biri.
Sondyqtan óńirler Prezıdent tapsyrmasy aıasynda ázirlengen jospardy júzege asyrý jumystaryn qarqyndy júrgizip, nysandardy der ýaqytynda paıdalanýǵa berýi qajet.
Alqa otyrysynda Úkimet basshysynyń orynbasary Altaı Kólginov mınıstrlik aldyna ulttyq sportty damytý mindetin de qoıdy.
«Búgingi kúni elimizdiń 500 myńnan asa azamaty ulttyq sport túrlerimen aınalysady. Ol óte jaqsy. Biraq, ony ary qaraı damytý kerek. Dástúrli sportty balalar arasynda dáriptep, urpaǵymyzǵa durys tárbıe berý mindeti alymyzda tur. Osy maqsatta bilim berý uıymdarynda dene tárbıesi sabaqtarynda ulttyq sport túrleri boıynsha mindetti komponent qoldanysqa engizildi. Qazaq kúresi memlekettik sporttyq tapsyrys aıasynda qarjylandyrylatyn sport sektsııalarynyń qataryna qosyldy. Memlekettik sporttyq qarjylandyrylatyn sport túrleriniń qataryna toǵyzqumalaq pen asyq atýdy qosý usynystary da túsip jatyr. Mınıstrlikke muny da qaraýdy suraımyz», - dedi Altaı Kólginov.