Elimizde jańartylatyn energııa kózderi nysandaryn salýǵa qatysty talaptar ózgermek

ASTANA. QazAqparat – Búgin Parlament Májilisinde jańartylatyn energııa kózderin paıdalanýdy qoldaýǵa baǵyttalǵan zań jobasy tanystyryldy, dep habarlaıdy QazAqparat tilshisi.

«Zań jobasyn qabyldaý jańartylatyn energııa kózderin belsendi engizýge, qyzmet kórsetýdiń jańa salasyn damytýǵa, jańa jumys oryndaryn qurýǵa, jelilik ınfraqurylymdy odan ári evolıýtsııalyq damytý jáne eldiń energetıkalyq sektoryna ınvestıtsııa tartýǵa yqpal etedi», - dedi Májilis depýtaty Dúısenbaı Turǵanov.

Osy oraıda ol jańartylatyn energııa kózderin damytýǵa ne kedergi keltirip turǵan aıtty.

«Bul turǵyda birinshi kezekte qarjy jaǵynan qoldaýdyń jetkiliksiz bolýy áser etip otyr. Búginde JEK salasynda paıdalanylatyn qondyrǵylar burynǵysynsha aıtarlyqtaı qymbatqa túsedi. Memlekettiń qarjylaı qoldaýynsyz halyqtyń paıdalanýyna shaǵyn JEK jobalaryn iske asyrý keńinen taralmaıdy. Qoldanystaǵy jańartylatyn energııa kózderin qoldaý týraly zańda jeke tutynýshylarǵa ataýly kómek kórsetý tetigi is júzinde jumys istemeıdi», - dedi depýtat.

Sonymen qatar ol jelilerge qosylý rásimi kúrdeli ekenin jáne kóp ýaqyt qajet etetinin jetkizdi. Qoldanystaǵy zańnamada birshama qarama-qaıshy jáne kúrdeli rásimder qarastyrylǵan.

«Budan bólek, shaǵyn jáne orta bıznesti qoldaý qadamdary jetkiliksiz bolyp tur. Jańartylatyn energııa kózderin engizý úshin bul bıznes sýbektilerin tikeleı nemese janama qarjylaı yntalandyrý tetikteri qarastyrylmaǵan», - dedi D. Turǵanov.

Zań jobasy aıasynda shaǵyn jańartylatyn energııa kózderiniń ıelerin jeke kásipker retinde tirkelý mindetinen bosatý usynylyp otyr. Munymen qosa, bul salada ataýly kómek tetigin keńeıtý eskerilgen. Jańartylatyn energııa qondyrǵysyna qatysty shekteýshi talaptardy joıý usynyldy.

«Jańartylatyn energııa kózderi nysandaryn, onyń ishinde shaǵyn nysandardy salýǵa jáne paıdalanýǵa arnalǵan taýarlar boıynsha keden alymyn tóleýden bosatý usynylady. Bul tásil jańartylatyn energııa sektoryn damytý úshin ekonomıkalyq yntalandyrýdy qamtamasyz etedi jáne jańartylatyn energııa kózderi nysandarynyń qurylysyn josparlap otyrǵandardyń shyǵyndaryn azaıtady», - dedi depýtat.

Budan buryn habarlanǵandaı, 2026 jylǵa qaraı jańartylatyn energııa kózderiniń 50-den astam nysany iske qosylady.