Elimizde janarmaı túrleriniń shekti baǵalary ózgerissiz qaldy

ATYRAÝ. QazAqparat – Energetıka mınıstrliginiń memlekettik retteý belgilengen bólshek saýdada ótkiziletin munaı ónimderine shekti baǵalardy belgileý týraly buıryǵy kúshine endi, dep habarlaıdy QazAqparat mınıstrliktiń baspasóz qyzmetine silteme jasap.

Buıryqqa sáıkes mynadaı markaly benzınniń baǵasy burynǵy deńgeıde qalady. Aı-80 – 89 teńge. Qostanaı men Soltústik Qazaqstan oblystarynda Aı-92 jáne Aı-93 markaly benzınniń baǵasy lıtrine 187 teńge, Qazaqstannyń basqa oblystarynda lıtrine 182 teńge, dızel otynynyń baǵasy lıtrine 450 teńgeni quraıdy.

«Buıryqpen Qazaqstan Respýblıkasynda berilgen júrgizýshi kýáligin kórsetken kezde dızel otynynyń lımıti óńirine qaraı kúnine 100 lıtr kólemde bir lıtrine 230-260 teńge baǵamen belgilengen. Al Qazaqstan Respýblıkasynda kólik quraldaryn tirkeý týraly kýálikti kórsetken kezde júk, arnaıy, mamandandyrylǵan avtomobılder men avtobýstar úshin bekitilgen lımıt 300 lıtr úshin táýligine óńirine qaraı lıtrine 230-260 teńge baǵamen satylady. Qalǵan sanattaǵy adamdarǵa, sondaı-aq kórsetilgen lımıtterden joǵary dızel otyny lıtrine 450 teńgeden bosatylatyn bolady», -dep habarlady mınıstrliktiń baspasóz qyzmeti.

Sondaı-aq Energetıka mınıstrligi múddeli taraptarmen birlesip, avtojanarmaı quıý stantsııalarynda (AJQS) satylatyn dızel otynynyń táýliktik kólemin odan ári qadaǵalaý úshin aqparattyq júıeni anyqtaýǵa baılanysty máselelerdi pysyqtap jatyr.

«Jaqyn arada AJQS ókilderimen birlesip júıelerdi testileý ótkiziletin bolady. Qazir 2019 jyly ónerkásiptik paıdalanýǵa engizilgen «Munaı ónimderiniń jekelegen túrlerin esepke alýdyń aqparattyq júıesi» yqtımal nusqalardyń biri retinde qarastyrylyp otyr. Elimizdegi AJQS naqty ýaqyt rejıminde munaı ónimderiniń qaldyqtary boıynsha derekterdi kórsetilgen aqparattyq júıege berip jatyr. QR Úkimetiniń 2015 jylǵy 31 jeltoqsandaǵy №1177 qaýlysyna sáıkes atalǵan aqparattyq júıeniń operatory «Ulttyq aqparattyq tehnologııalar» AQ bolyp tabylady», -dep naqtylady baspasóz qyzmeti.

Argus Kaspıı naryǵy servısiniń derekteri boıynsha EEO-ǵa múshe elderde dızel otynynyń quny 2022 jylǵy 1 tamyzda mynadaı baǵany qurady. Armenııada 1 lıtr dızel 758 teńge, Reseıde – 446 teńge, Qyrǵyzstanda – 412 teńge, al, Belarýs Respýblıkasynda 446 teńge.

Eske sala ketelik, budan buryn Atyraý oblysynda Aı-92 janarmaıynyń ortasha baǵasy 169 teńge turatynyn habarlaǵan edik.