Elimizde zańsyz aınalymǵa jıi shyǵatyn ónimder ataldy

NUR-SULTAN. QazAqparat – Qazaqstanda kóbine qandaı ónimder zańsyz aınalymǵa shyǵady. Naryqtaǵy kontrafaktilik ónimder týraly «Kazpatent» dırektory Erbol Ospanov aıtyp berdi, dep habarlaıdy QazAqparat tilshisi.

«Zańsyz ónim aınalymy farmatsevtıka salasyn da aınalyp ótpedi. Ásirese, COVID-19-ǵa qatysty jalǵan dári-dármekter men medıtsınalyq buıymdardyń taralýy ózekti bolyp otyr. Jalǵan dári-dármek kontrafaktilik taýarlardyń ishindegi eń zııandysy ári qaýiptisi. Sońǵy jyldary dári-dármekti zańsyz óndirý, satý men tutynýdyń aıtarlyqtaı óskeni baıqalyp otyr. Mysaly, ótken jyly Almatyda Ekonomıkalyq tergeý departamenti bógde taýar tańbasyn paıdalana otyryp, oramasyn qoldan jasap, jaramdylyq merzimin ózgertý jolymen dárilik zattardy daıyndaý jónindegi jerasty tsehynyń qyzmetin anyqtap, toqtatty», - dedi Erbol Ospanov OKQ-de ótken baspasóz máslıhatynda.

Onyń aıtýynsha, búginde jalǵan ónim daıyndaıtyn tsehtardy anyqtap, qyzmetin toqtatý basty mindet bolyp otyr.

«Kontrafaktilik jaǵdaı etek jaıyp otyrǵan taǵy bir sala – azyq-túlik. Jyl saıyn álemde myńdaǵan tutynýshy jalǵan tamaq satyp alady. Alaıaqtar taýardyń markırovasyn qate jazý jáne óndirilgen el boıynsha jalǵan aqparat berý arqyly ustalyp jatady. Bul árekettiń taǵy bir teris tusy baǵany jasandy ósirýge ákelip soqtyrady», - deıdi ol.

Aıta ketsek, elordada kontrafaktilik taýar aınalymy máselesine arnalǵan halyqaralyq forým ótti.

Osyǵan deıin elimizge 30 mlrd-tan astam teńgeniń kontrafaktilik ónimi ákelingeni belgili boldy.

Odan bólek , elimizde kontrafaktilik ónim salasynda 77 mln teńgege zań buzýshylyq anyqtalǵanyn aıtyldy.