Elimizde zańdastyrylǵan petıtsııalar ınstıtýty paıda bolady

ASTANA. QazAqparat – Elimizde petıtsııalardy qabyldaý aýdandyq, oblystyq jáne úkimettik deńgeılerge bólinedi. Shekti daýysty jınaǵan petıtsııadaǵy máseleni jumys komıssııasy qaraıdy. Bul týraly Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet jaýap berdi, dep habarlaıdy QazAqparat tilshisi.

«Senat zań jobasyn qabyldaǵan soń jyl sońyna deıin memlekettik organdar jeke portal nemese platforma ázirlep, zańdastyrylǵan petıtsııalar ınstıtýty iske qosylady. Petıtsııa berýge belgilengen shekti normalarǵa sáıkes 2,5 myńnan 50 myńǵa deıin daýys jınalýy tıis. Petıtsııa jınalǵan daýys sanyna baılanysty qaraýǵa alynady. Aýdandyq deńgeıde qaralatyn jergilikti másele boıynsha petıtsııa berý úshin 2,5 myń daýys qajet. Petıtsııa qaraýǵa alynǵan jaǵdaıda aýdandyq ákimdik pen máslıhat janynan komıssııa qurylyp, máseleni talqylaıdy», - dedi Madııar Qojahmet «Amanat» partııasy alańynda ótken baspasóz máslıhatynda.

Komıtet basshysynyń málimetinshe, petıtsııany qaraıtyn komıssııa quramyna jergilikti atqarýshy bılik ókilderi, depýttar men qoǵam belsendileri kiredi.

«Jalpy petıtsııalardy qabyldaý aýdandyq, oblystyq jáne úkimettik deńgeılerge bólinedi. Oblystyq máselelerdi sheshý boıynsha petıtsııa jazý úshin kem degende 5 myń daýys jınalýy tıis. Al Úkimet deńgeıinde qaralýy tıis problema bolsa, ony 50 myń adam qoldaǵan jaǵdaıda ǵana máseleni Úkimet qarap, sheshim qabyldaıdy», - deıdi ol.

Buǵan deıin «Petıtsııa arqyly sheneýnikterdi laýazymynan bosatýǵa bola ma?» degen saýalǵa túsinik berilgen edi. Sondaı-aq petıtsııa jazýǵa bolatyn taqyryptarǵa qatysty aıtyldy.