Elimizde úshinshi, tórtinshi, besinshi balalar kóbirek dúnıege kelip jatyr - Tamara Dúısenova

ATYRAÝ. QazAqparat – Eńbek jáne halyqty áleýmettik qorǵaý mınıstri Tamara Dúısenova Atyraýda ÚEU jáne ardagerler uıymdarynyń ókilderimen, áıeldermen, kópbalaly analarmen kezdesti. Kópbalaly otbasylardy, múgedektigi bar adamdardy áleýmettik qoldaý sharalaryn, ázirlenip jatqan Áleýmettik kodekste qazaqstandyqtardy zeınetaqymen qamtamasyz etý júıesin jaqsartýdyń jańa tásilderin túsindirdi, dep habarlaıdy QazAqparat.

Mınıstrdiń aıtýynsha, táýelsizdik jyldary Qazaqstanda azamattardy áleýmettik qoldaýdyń keshendi júıesi quryldy.

Onda memlekettik járdemaqylar, áleýmettik tólemder, jumyspen qamtýǵa járdemdesý jónindegi sharalar, ómirdiń barlyq kezeńinde salyq salý jeńildikteri qamtylǵan.

«Byltyr memlekettiń bıýdjetinen 4,9 mln azamatqa zeınetaqy men áleýmettik tólemderdi tóleýge shamamen 4 trln teńge bólindi. Bul – el bıýdjetiniń tórtten bir bóligi. Atyraý oblysynda byltyr zeınetaqy men járdemaqy alýshylar sany 193,5 myń adamdy nemese oblys halqynyń jalpy sanynyń 29,3 %-yn, tólemderdiń jalpy somasy 125,6 mlrd teńgeni qurady. Bıyl 1 qańtardan bastap bazalyq zeınetaqy men járdemaqy mólsheri 5%-ǵa, yntymaqty zeınetaqy 7% ındeksteldi. Al, 1 sáýirden bastap ınflıatsııa dálizin qaıta qaraýǵa baılanysty zeınetaqy men járdemaqy qosymsha 4% ındeksteldi», – dedi Tamara Dúısenova.

Mınıstr málimetine súıensek, balaly otbasylardy áleýmettik qoldaýǵa bıýdjetten tólenetin járdemaqynyń 5, memlekettik áleýmettik saqtandyrý qorynan tólenetin tólemderdiń 2 túri kiredi.

Bıyl bul maqsatqa 38,3 mlrd teńge bólinip, ótken jylmen salystyrǵanda 13%-ǵa artqan.

«Elimizde qabyldanyp jatqan áleýmettik qoldaý sharalary demografııalyq jaǵdaıdy jaqsartýǵa múmkindik berdi. Máselen, 2020 jyly 426,8 myń, al, 2021 jyly 446,8 myń bala ómirge keldi. Osy oraıda úshinshi, tórtinshi, besinshi jáne odan da kóp balanyń ómirge kelý úrdisi baıqalady» -deıdi mınıstr.

Qazir múgedektigi bar adamdardy tehnıkalyq quraldarmen jáne ońaltý qyzmetterimen qamtamasyz etý áleýmettik qyzmetter portaly arqyly júzege asyrylady.

Portalda múgedek adamdardy ońaltýdyń tehnıkalyq quraldaryn, sanatorlyq-kýrorttyq emdeý, jeke kómekshiniń, ymdaý tili mamanynyń qyzmetterin, olardy jetkizýshilerdi óz betinshe tańdaı alady.

Jyl basynan beri Atyraý oblysynyń turǵyndary portal arqyly 11 myńnan astam ońaltý sharalaryn alǵan.

«Áleýmettik qyzmetter portaly arqyly ońaltý quraldary men qyzmetterimen qamtamasyz etý ýaqytyn 8 aıdan 2 aptaǵa deıin qysqartýǵa, múgedektigi bar adamdarǵa kórsetiletin qyzmetter men ońaltý qyzmetterimen qamtýdy tańdaýdy ónim berýshiden jeke qajettiligin, sapasyn, bedelin jáne basqa paıdalanýshylardyń pikirlerin eskere otyryp, tikeleı usynýǵa bolady. Múgedektigi bar adamdardyń qaı jerde ornalasqanyna qaramastan, ońaltý quraldary men qyzmetterin tańdaýyna múmkindik berý, mysaly, sanatorııdi aýrýyna baılanysty basqa aımaqtan tańdaýyna múmkindik berilip otyr. Alaıda, ońaltý quraldarynyń sapasyna, jetkizýshiler ustanatyn baǵa saıasatyna qatysty máseleler áli de bar. Sondyqtan, bul baǵyttaǵy jumystardy jaqsartý jalǵasatyn bolady», -dedi Tamara Dúısenova.

Eske sala ketelik, budan buryn Tamara Dúısenova jumysshylardyń eńbek quqyǵyn qorǵaýǵa erekshe nazar aýdarý qajettigin aıtqan edi.

Sondaı-aq, Teńizdegi jobadan bosaıtyndardy jumysqa ornalastyrý jóninde Jol kartasy jasaldy.