Elimizde ushaqpen júk tasymaldaý jeńildeıdi
«E-Freight jobasy - ol júkterdiń áýe tasymaly salasynda qaǵazsyz qujat aınalymynyń aqparattyq júıesi. Jańa qyzmet tranzıttik júk aınalymynda Qazaqstannyń áýe keńistiginiń tartymdylyǵyn kóteredi. Sonymen qatar, elimizdegi áýe tasymaldaýshylardyń básekege qabilettiligin arttyrady. Bul joba júkterdi rásimdeý ýaqytyn azaıtady», - dedi «TransInfoTech» JShS baqylaý keńesiniń tóraǵasy Sajar Rahmetjanov.
Óz kezeginde «Qazposhta» AQ «Ońtústik» aqparattyq-logıstıkalyq ortalyq basshysy Eljan Qasymov fýlfılment-ortalyqtar týraly baıandady.
«Qurmetti Nursultan Ábishuly! 2017 jyly «Qazposhta» qýattylyǵy táýligine 120 myń sálemdemeni suryptaı alatyn avtomattandyrylǵan jelini iske qosty. Bıylǵy jyly elektrondy kommertsııa ortalyqtary jumys isteı bastady. Ulttyq poshta operatory álemdik ınternet-dúkenderge keshendi qyzmet usyna alady. Elektrondy kommertsııa naryǵynda 42 myń jańa jumys orny ashyldy. Qazaqstanda elektrondy saýdany damytýǵa baǵyttalǵan búkil ınfraqurylym qalyptasqan. Búginde Astana, Almaty men Aqtóbede fýlfılment-ortalyqtar jumysyn bastaýǵa daıyn. Olardyń jobalyq qýattylyǵy jylyna 8 mln sálemdeme. Al boljamdy ekonomıkalyq áseri 3,6 mlrd teńgeni qurap otyr. Qazir «Qazposhta» AQ atalǵan ortalyqtardy iske qosýǵa daıyn», - dedi E. Qasymov.
Budan bólek, jalpyulttyq telekópir barysynda «QazTransOıl» kompanııasynyń tsıfrlandyrylǵan dıspetcherlik ortalyǵy da jumysyn bastady. Qurylǵan digital-júıe Qazaqstanda munaı tasymalyn basqarýǵa múmkindik beredi. Onlaın rejıminde bas dıspetcherlik basqarý munaıdy qabyldaý men ótkizýdi iske asyryp, shıkizatty munaı óńdeý zaýyttaryna baǵyttaıdy.
«Tsıfrlyq Qazaqstan - qýatty Qazaqstannyń múmkindikterin bildiredi. Osy jańa múmkindiktermen sizderdi quttyqtaımyn. Іske qosýǵa ruqsat beriledi», - dedi Memleket basshysy Nursultan Nazarbaev.